SHILLONG: Meghalaya a·dokni a·palrango donggipa centre-rango sena donatako man·e Common University Entrance Test (CUET)-ko serikna man·gijagipa chatro chatrirangna cholrangko on·taigen ine Bristibar salo a·dok sorkari parakataha.
Education department-ni Joint Secretary D Lyngdoh-ni parakatani gitade, CUET 2023-ni bidingo a·dok sorkari, Education Ministry aro National Testing Agency (NTA)-na u·iatmanaha.
“Uni gimin NTA-ni data-o pangchake Meghalaya a·dokni a·palrango sena donatako man·e CUET porikkako serikna man·gijagipa chatro chatrirangna cholrangko on·taina gita a·dok sorkari tik ka·angaha,” ine Lyngdoh parakataha.
June 16 tariko ong·atenggipa Central University Entrance Test (CUET)-ko sena gita Tura Don Bosco College-ni komibeoba sak 40 chatro chatrirangna Ranchi-ko examination centre dake donatahachim aro iani a·selan bang·bata chatro chatrirangan CUET-ko serikna chol ong·tokjahachim.
CUET-ko sena nangenggipa Meghalaya a·dokni mitam chatro chatrirangna Ranchi, Jharkhand, Jorhat, Dibrugarh, Kolkata aro uandakgipa biaprangosa porikka sechakani centre-rangko on·ahani gimin CUET-ko seenggipa chatro chatrirangna ta·raken dingtang cholrangko tarichina gita National Testing Agency (NTA)-na ge·etaniko on·atchina ine a·dokni Chief Minister Conrad K Sangma, Union Education Minister Dharmendra Pradhan-na sedoatskaahachim.
Iani bidingo Union Education Minister-na sedoatengon, Meghalaya a·dokni chatro chatrirangna a·dokni a·palrangosa CUET-ko sena centre-rangko on·ahani gimin CUET-ko sena sienggipa chatro chatrirang bang·batan badi ka·tokaha ine Budbar salo, a·dokni Chief Minister, suk ong·gijaniko parakatenba, ia chatro chatrirangna a·doktangon ong·jaoba sepangkalgipa biaprango centre-rangko on·skachina didiatahachim.
Meghalaya a·dokni chatro chatrirangna CUET-ko sena gita Ranchi, Jharkhand, Jorhat, Dibrugarh, Kolkata aro a·songni salgipeng jolrango centre-rangko on·anichi porikkako sena sienggipa chatro chatrirang aro uamangni ma·a paarang jagokmanpilengaha ine janapatengon, ia chatro chatrirang sepangkalaon porikkako sena man·gen ine ka·dongsoani gnangsa porikkana tarisamtokahani gimin ian chatro chatrirangna namen neng·nikani ong·engaha ine Chief Minister parakatahachim.