TURA: West Garo Hills a·jani Phulbari jolrango batanggimin salgittamna joljol bijoliko man·jaengani a·sel jolo songdongenggipa manderang aro mongsongbate skulrango poraienggipa bi·sarang neng·nikanirangko chagrongna nangtokenga ine u·iataha.
Koborko on·ani gitade, Phulbari jolrango bijoli on·aniko nirokna gita FEDCO private company-na daitoko on·ahachim indiba ia company, jolo songdongenggipa manderangna nanga gita bijoliko on·na man·chipkujaengachim.
“Da·o gita ding·karini somoioba ia jolrango bijoliko name on·jaengani a·selan manderang chaktopilgija ding·aniko chakna nange cha·napgija tunapgijarang dongna nangtokpilengaha. Phulbari jolrango pangnan indake bijoli sirongengani a·selan manderang neng·nikanirangko chagrongna nangtokenga,” ine Phulbari jolna kamko ka·enggipa Peter A Sangma parakataha.
Phulbari jolrango bijoliko namdapate on·na gisik nangteljaengani a·selan on·tisa mikka balwa rakbaon, bijoli sirongaia ine Phulbari jolni sakgipin social activist Samgar R Sangma parakatskaaha.
“Salantian bijoli sirongengani a·sel me·chikrang, bi·sa bakgitchakrang aro budepa butchumarang bilongen neng·nikanirangko chakna nangtokenga. Ia chasongo bijoliko mandena nangchongmota indiba iandake bijoliko name on·jaenganiara bijoliko nirokenggipa manderangni kamtango gisik nanggijaniko mesokanisa ong·enga. Phulbari jolo songdongenggipa manderangni neng·nikanirangko namatna gita ta·raken Power Minister aro joltangni MLA AT Mondal, ja·kuko de·na nanga,” ine Sangma parakataha.
Phulbari jolrango name bijoliko on·na man·jaengani gimin MLA an·tangan inquiry-ko a·bachengatna nanga ineba jolo songdongenggipa manderang dabiangtokaha.