TURA: South Garo Hills a·jani Baghmara-o donggipa Pioneers’ Secondary School aro United Baptist Secondary School-na skul nokrangko nangdapenga ine A·chik Conscious Holistically Integrated Krima (ACHIK) Southern Zone parakatenba, ia skul nokrangko rikna gita tangka paisarangko on·china gita South Garo Hills a·jani Deputy Commissioner-na sedoataha.
Iani bidingo South Garo Hills a·jani Deputy Commissioner-na seachi u·iatengon, ia skulrangona uamang re·ange nion, skulo poraienggipa bi·sarang, biap dongjae, apchangketgipa biapona songe skie ra·na nangtokenga ine nikna man·aha ine ACHIK Southern Zone-ni dilgiparang parakatenba, ia skulrangna gital nokrangko rike on·na aro gipin nangchongmotgipa bosturangko ra·e on·na man·na gita dingtang dingtang department-rangoniko tangka paisarangko gilchimongchina gita Deputy Commissioner-ko didiataha.