TURA: International Day Against Drug Abuse & Illicit Trafficking-ko maniani bak gita Sombar salo, Garo Hills-ni dingtang dingtang biaprango dingtang dingtang program-rangko ong·atangaha.
Tura-o ia salko West Garo Hills a·jani District Administration, District Medical & Health Office, District Police, Education aro Social Welfare department-rang baksa nangrime, Tura-ni District Auditorium-o maniangaha aro ia program-ko ong·atanio, Tura Baptist Mondolini gitcham Pamong, Rev (Dr) Wetterfield R Marak, mongsonggipa sokgipa ong·e jinmana aganprakangengon, an·tangni dingtang dingtang songrangchi re·ange nikani bidingo janapangenba, skangonin mitam songrangode ma·sigija drugs ba pekatgipa samrangko palengachim ine parakangaha. Ganja-ko chongipa katepo gong 10-mangsan dakaia ine janapatengon, iandakgipa bosturangara mandeni janggiko nisigalna man·a ine chadamberangko iandakgipa bosturangoni chel·e dongchina gita Rev Marak didiangaha.
Drugs ba pekatgipa samrangko pangnan jechakgiparang ong·china gita chatro chatrirangko didiangengon, chatro chatrirangan mikkangchi a·songko aro jatko dilnagiparang ong·a ine Rev Marak, chadamberangko poraianirango gisik nangchina didiangaha.
Mobile phone-rangko jakkalani giminba janapatengon, ian skie ra·anio aro koborrangko ra·grikanio namen dakchakbegipa ostro ba kol ong·a indiba iako jakkalsretode ian mandena aro uni janggi tanganio nisianikosa ra·baskana man·a ine Rev Marak parakataha.
Iana skang, West Garo Hills a·jani Deputy Commissioner Jagdish Chelani-ba jinmana aganprakengon, drugs-rangko jakkalani namgijanirangko manderangna u·iatna nangengani gimin aganangenba, songsalko drugs-rangoni jakgitel ong·gipa songsal ong·atchina jolo songdongenggipa mande sakantikon didiangaha.
Ia salna skang, Meghalaya a·dok gimiko police-rang, chang 200-mangni gita awareness program-rangko ong·ate, manderangna drugs-rangko jakkalani aro badingsrukani bidingo mikrakataniko on·angaha ineba Deputy Commissioner parakataha.
Ia program-ko ong·atanio dongpae jinmana aganprakanggipa gipin manderangara, Tura Civil Hospital-ni Counsellor Amesha Sangma, Deputy Superintendent of Police (DSP) Walsal Momin, District Social Welfare Officer Hemaritha Sangma aro gipinrang ong·a.
Apsan daken, North Garo Hills a·jaoba ia International Day Against Drug Abuse & Illicit Trafficking-ko Resubelpara-ni DIET campus-o maniangaha aro ia salko manianio North Garo Hills a·jani Additional Deputy Commissioner JRT Sangma, mongsonggipa sokgipa ong·e jinmana aganprakangengon, pekatgipa samrangko jakkalanichi mandena mai namgijanirangko ra·bana man·achim, uarangni gimin agan-talate on·angenba, pekatgipa bosturangoni chel·e dongchina jolo songdongenggipa manderangko didiangaha.
Ia tom·anio North Garo Hills a·jani ASP SR Marak-ba jinmana aganprakengon, pekatgipa samrangko jakkalani aro badingsrukani bidingo a·jani dingtang dingtang biaprango awareness program-rangko ong·atenba, manderangna mikrakatanirangko on·aha ine parakataha.
Ia program-ko ong·atanio dongpae jinmana aganprakanggipa gipin manderangara, North Garo Hills-ni Medical & Health Officer NR Marak, District Social Welfare Officer CD Arengh aro gipinrang ong·a.
Indake ong·engon, ia International Day Against Drug Abuse & Illicit Trafficking-ko maniani bak gita Goeragre-o donggipa 2nd MLP Battalion, dingtangmancha Goeragre-oni Tura Dakopgre-ona bike rally-ko ong·atangskaaha. Ia bike rally-ko a·bachengatna skang, 2nd MLP Battalion-ni Commadant BA Sangma-ni dilanichi battalion-ni sipairang, drugs jakkalaniko warachakna gita jinma ku·mikchetangaha.
Apsan daken, Tura-ni Dakkopgre-o donggipa 120 Bn CRPF-ni gitaba ia International Day Against Drug Abuse & Illicit Trafficking-ko Dakopgre-o maniangaha aro ia program-ko ong·atanio 120 Bn CRPF-ni Commandant Pramod Kumar Singh, jinmana aganprakengon, drugs ba pekatgipa samrangara mandeni janggi tanganiko nisigalgiparangsa ong·ani gimin CRPF-ni sipairang maming saloba pekatgipa samrangko jakkaljawa ine an·tangni ka·dongchakenganiko parakangaha.
Ia program-ko ong·atanio 120 Bn CRPF-ni medical officer Dr Shaik Roshan Zameer, drugs-rangko jakkalani namgijanirangko jinmana agan-talate on·angskaaha.
caption:Tura-ni District Auditorium-o International Day Against Drug Abuse & Illicit Trafficking-ko manianio Tura Baptist Mondolini gitcham Pamong, Rev (Dr) Wetterfield R Marak, jinmana aganprakenga.