SHILLONG: India a·songara dingtang dingtang jat aro toromo bebera·giparangni meli nangrime songdong a·chaenggipa a·songsa ong·ani gimin Uniform Civil Code (UCC)-ara a·songni kosako re·ani gitasa ong·a ine Sukrobar salo, a·dokni Chief Minister aro National People’s Party (NPP)-ni national president Conrad K Sangma parakataha.
“NPP-ni nikaniode Uniform Civil Code-ara India a·songni kosako re·gipa niam gitasa ong·enga. Iako anga chingni party-ni nikanikosa aganenga,” ine Chief Minister aganaha.
Chief Minister-ni parakatani gitade, India a·songara dingtang dingtang jat aro toromo bebera·giparangni a·songsa ong·a aro ian a·songni bilba ong·achim.
Maidakgipa bill-ko ra·bana sienga, uni giminde da·o dipet ma·sikujaenga ine janapatengon, bill-ni gimin seanirangko ma·sigijade iani bidingo da·o dipet name aganna man·kujawa ine Sangma parakataha.
“Name niatgenchimode an·chingni songsalara me·chikrangko noko donani aro me·chikrangna gam-jinrangko on·rikgipa songsalsa ong·a aro ian an·chingni daka rikani ong·e an·chingni bilba ong·engani gimin iako an·chingna dingtangatna man·jawa,” ineba Chief Minister parakataha.
Salgro salaram a·dokrangara daka rikanio namen dingtanggipa jol ong·a ine janapatengon, ia jolo songdongenggipa manderang apsan daken dongna nangnikaigen aro jatni daka rikanirangko dingtangatna sikjawa ine Sangma parakataha.
Iani bill ong·katahaon uamang draft-o maiko sea ukosa nichengna nangnikenga ine janapatengon, “India a·songara dingtang dingtang jat aro toromo bebera·giparangni meli nangrime janggi tangenggipa a·songsa ong·ani gimin ian a·songo songdongenggipa manderangna kraani ong·jawa. Uni gimin NPP-ni nikani gitade, ia Uniform Civil Code-ara a·songni kosako re·ani gitasa ong·gen,” ine NPP-ni national president parakataha.
