SHILLONG: Meghalaya a·dokara me·chikrangni bewalko ja·rikgipa songsal ong·genchimoba police-rangni see rakkianirangko nigenchimode a·doko me·chikrangna naljokani donggijaniko nikskana gita man·enga.
2022 bilsina Meghalaya Police-ni see rakkianiko nigenchimode, ia bilsimangmangon me·chikrangni kosako ong·gija dakani gimik ming 603 case-rangko segataha aro ia ming 603 case-rangoni ming 345-de Protection of Children from Sexual Offences Act 2012 (POCSO), ming 78-de drae til·ekani aro ming 63 case-rangde me·chikrangko kragija dake jak sokani case-rang ong·achim.
Ia ming 603 case-rangoni ming 24-de drae til·ekna jotton ka·ani, ming 26-de rim·gittangani, ming 2-de me·asani maharina ku·mitdu on·jani a·sel siani, 23-de me·chikrangko kragija kattarangko aganani, ming 29-de segipa ba ma·drangrangni ka·saninggija dake jakkalani, ming 3-de me·chikrangko so·ote siatani, ming 3-de Dowry Prohibition Act-ni ning·o segatgipa, ming 5-de so·otani aro ming 2-de mande rim·gittanganio nangchakegipa case-rang ong·a ine police-rangni see rakkianio parakaha.
Ming 345 POCSO case-rangoni ming 93-de East Khasi Hills-o, ming 41-de West Khasi Hills-o, ming 36-de Ri Bhoi a·jao aro ming 36-de West Garo Hills a·jao ong·a.
Ia bilsio me·chikrangni kosako ong·gija dakani case-rangko segatani case-rangara East Khasi Hills-o 28%, West Garo Hills-o 19%, West Khasi Hills-o 9%, South West Garo Hills-o 9%, West Jaintia Hills-o 9%, East Jaintia Hills-o 8%, East Garo Hills-o 5%, North Garo Hills-o 3%, South Garo Hills-o 3%, South West Khasi Hills-o 3%, Ri Bhoi a·jao 2% aro Eastern West Khasi Hills-oba 2% ong·ahachim.