RESUBELPARA: Sombar salo, Tura-ni MP Agatha K Sangma, District Development Coordination & Monitoring Committee (DISHA)-ni tom·aniko North Garo Hills a·jao ong·atenba, dingtang dingtang department-rangni jako ra·e ka·enggipa ma·mong sorkarini scheme-rangko nipilangaha.
Ia tom·aniko Mendipathar Multi Purpose Hall-o ong·atangaha aro tom·anio Kharkutta-ni MLA Rupert Momin, Mendipathar-ni MLA Marthon J Sangma, Bajengdoba-ni MLA Pongseng Marak, GHADC-ni MDC Crozier Momin, sakgipin MDC Aldo A Sangma, North Garo Hills a·jani Deputy Commissioner Mitali Chandra aro dingtang dingtang department-ni officer-rangba bak ra·angaha.
Ia tom·aniko ong·atani bidingo Tura-ni MP Agatha K Sangma, tom·anio bak ra·gipa dingtang dingtang dilgiparang aro department-ni officer-rangna talate on·angengon, an·tangtangni jako ra·e ka·enggipa scheme-ni bidingo sing·na nanganirang ba maiba neng·nikanirang donggenchimode agan-talatanirangko on·china didiangenba, iani bidingo ua ma·mong sorkari baksa agangrikskagen ine ku·rachakaniko on·angaha.
Ia tom·anio North Garo Hills a·jani Deputy Commissioner Mitali Chandra, rimchaksoani kattarangko aganangengon, dingtang dingtang department-ni ning·o ka·enggipa scheme-rangni chu·sokani aro neng·nikanirangko DISHA-ni membor-rangna talate on·angjolaha aro mikkangchi jolo songdongenggipa manderangni namgnina ma·mong sorkarini ra·gate on·gipa scheme-rangko nambate chu·sokatna gita ku·rachakaniko on·angaha.