TURA: West Garo Hills a·jao mongmarang re·ruraronge manderang neng·nikanirangko chagrongna nangenggipa damsni songrango, samtangtangko ripingna kam ka·enggipa Aaranyak dolni gita ge 10 solar light-rangko songe on·angaha.
Ia songrangara, Borogobal, Photamati, Kharsengdap, Bondukmali, Darengsigre, Bordubi aro Jamdanggre songrang ong·a.
Aaranyak doloni u·iatani gitade, ia songrango bijoli dongjae, mongmarang napbaani somoirango songni manderangna kenchakna nanganirang ong·enga ine nikenba, songni manderangna adita dakchakanirangko on·na gita ia songrango solar light-rangko songe on·angaha.
Ia songrangara, Garo, Rabha, Bodo aro dingtang dingtang jatrangni songdong a·chaenggipa songrang ong·a ine talataniko on·angengon, “Ia songrangona mongmarang re·barongani gimin manderangna kenchakna nanganirang ong·enga aro walni somoirango manderangna naljokaniko on·na gita solar street light-rangko nangchongmotengachim. Da·o ia songrango solar light-rangko songe on·ahani gimin walni somoirango manderangna adita naljokanirangko on·na man·gnok,” ine Aaranyak-ni Senior conservation scientist Dr Bibhuti Prasad Lahkar parakataha.
Official-rangni u·iatani gitade, ia chasongo manderangni jelbra jelsuanirang batroroengahani gimin mongmarangni dongchakgipa biaprangoba manderang songdong a·chatokengahani a·selan bang·a changon mongmarangni, manderangni songdongchakgipa biaprangona re·bae manderangni nok-jam aro bagan barirangko nisie galanirangko bang·en nikna gita man·engahachim.
Indake ong·engon, West Garo Hills a·jani song damsnio ia solar light-rangko Aaranyak-ni manderang, re·anggipa June 28 tariko, Darwin Initiative Support-ni ning·o, Meghalaya Forest department aro British Asian Trust baksa nangrime songe on·aha ine kobor on·aha.