TURA: Re·anggipa June-ni 16 tariko ong·atanggipa Common University Entrance Test (CUET)-ko sena gita Meghalaya a·dokni bang·bata chatro chatrirangkon gipin a·dokrangosa aro mongsongbate chel·a biaprangosa donatahani a·sel porikkako serikna gita man·tokjahaon, CUET-ko serikna man·gijagipa chatro chatrirangna porikkako ra·taiani bidingo name talate on·china gita Tura-ni social activist saksa a·dok sorkariko didiataha.
Re·anggipa Mongolbar salosan, Meghalaya a·dokni Chief Minister Conrad K Sangma, Union Education Minister Dharmendra Pradhan-ko New Delhi-o grongenba, CUET-ko serikna man·gijagipa a·dokni chatro chatrirangna cholko on·taichina mol·molaha ine parakatahachim indiba CUET-ko serikna man·gijagipa chatro chatrirangna cholko on·bebetaigenma on·jawa uni giminde maming talataniko on·jahachim.
CUET-ko sena gita gipin a·dokrangosa centre-ko on·ahani a·sel porikkako serikna man·gijagipa a·dokni chatro chatrirangna dingtangmancha CUET-ko ra·taina gita Education Ministry aro NTA-na ge·etaniko on·china Union Education Minister Dharmendra Pradhan-ko mol·molaha inesan Chief Minister parakataiahachim.
Indake ong·engon, CUET-ko serikna man·gijagipa chatro chatrirangna cholko on·piltaigen ine sorkari u·iatgenchimoba, da·alona kingkingan tik ong·e parakatanirangko man·sokujaengani a·sel chatro chatrirangni gisepo jajaanirang ong·katengaha ine Tura-ni saksa Cherian Momin minggipa social activist parakatenba, iani bidingo chatro chatrirangna name talate on·china a·dokni Chief Minister aro Education Minister-ko didiataha.