U·IATTIMGIPAONI
Baghmara: South Garo Hills-ni Baghmara, Wagesik aro Malikona-o tranformar nosto ong·ani ja·mano antisa batangpilaha da·o bijoli donggija dongenga.
Transformar nosto ong·anichi ding·kari ding·gol-gramchiee ding·miting somaio uamangko bijoli gri ong·e donengon MeECL changsatai bijoli jakkalgiparangoniko bill-rangko matchote on·china sin·jetaha.
MeECL-ni bill gamjringgiparang da·alona dipete bill-rangko bon·e gamengachim indakomangba department uamangni kamko ka·na aratenga aro ding·a chakatna gita nangenga, uamang aganaha.
“MeECL-ni kam aro uamangni bang·a department-rang bijoliko on·ani aro department-na bangki donggipa bill-ko matchote on·china amenga. Maikai bijoli on·a aratenga a·selkon ma·sija, department tik ong·gijagiparangoniko bill-rangko ama dongja. Da·o jensalo transformar nosto ong·aha transformar-ko songna skang gamkugijagipa bill-rangko matchote on·china uamang sin·jetenga,” Malikona-ni saksa aganaha.
Bill gamgijagiparangni kosako maina sandija aro uamangni line-rangko maina den·ja unode bill-rangde bang·e dongjawachim ine saksa aganaha.
“Bill gamgijagiparangna lekka sokataoniko aro uamangni line-rangko den·ako uamangko maia champengaha, chinga aiao inmanpilaha. Department-ni aratanichi ba bill gamgijagipa gipinrangni a·sel chinga maina sastiko man·gen? Ian namen namen namgijagipa kam aro bewal ong·enga. Skanggipao chinga load shedding on·simanichi neng·nikako man·a aro da·o ia ding·kario on·tisa bijoli man·a nangakoba chingoniko ra·seke katako man·a,’’ Wagesik-oni sakgipin aganaha.
Malikona-oni saksani aganani gita, chinga lak 4-mangni bill-rangko gamaha indiba department bijoli jakkalgiparangoniko gong 17.8 lak tangkarangko am·kuenga.
“Bill gamgipa gamgija apsan ringo ong·a aro sakantian sastiko man·a nangenga. Department man·a nanggipa bijolini bill-rangko man·a ba gamgijagiparangni bijoli line-rangko den·a nanga. Ia kam gimikan MeECL-ni aratani gimin ong·a,” saksa aganaha.
Indake ong·engon ka·o nanggiparang ua obostako dakchakchina SGH-ni Deputy Commissioner-ona re·angaha. Re·baenga salsa ba salgnio bijoli on·jaode uamang Consumer Court-ona re·anggen ine uamang chanchiaha. Ua obostani gimin department-ko kobor ra·oba kamrang chu·sokna gita man·kujaenga.