U·IATTIMGIPAONI
SHILLONG: Education Ministry-ni 2021-2022 bilsina Performance Grading Index (PGI) ranking-o Meghalaya a·dok bon·kamgipa biapkosa man·taiahaoba batanggimin bilsirangko niatgenchimode da·o adita namdapanirangko nikna man·aha ine a·dokni Education Minister Rakkam A Sangma a·kangatskaaha.
Iani bidingo kobor ra·timgipa manderang baksa agangrikengon, a·dokrangna grade-rangko on·anio uamang skulrangonade re·angkuja aro batanggimin bilsirangko nipilatgenchimode 2017 bilsini PGI ranking-o level 8 ong·aoni da·o ia bilsiode level 6-ona tang·dobaaha ine Education Minister parakataha.
Kerala a·dok gita dal·dalgipa a·dokrangde skangonin Meghalaya a·dokna namen batachim aro salsanode uamang baksa apsan ong·na man·jawa ine janapatengon, 2020-2021 bilsini PGI ranking-o Kerala a·dokni points 901-oni 928-ona bariangaha aro Meghalaya a·dokba 649-oni 716-ona bariangahani gimin Kerala a·dokna baten bang·bata point-rangko man·dapaha ine Sangma parakataha.
“Kerala a·dok jekai namroroenga an·chingni a·dokba ka·sinsin namrorobaenga. Iako namdapatanio ta·rakede man·jawa indiba sorkari rakbee kamrangko ka·enga,” ine ua aganaha.
Meghalaya a·dok baksana salgro salaram jolni Mizoram aro Arunachal Pradesh a·dokrangba, lekka poranio ja·manchakbatsrangenggipa a·dokrang ine Education Ministry-ni PGI-o channako man·ahachim.
Akanshi – 3 grade-o Meghalaya, 420.6 point-rangko, Mizoram 453.4-ko aro Arunachal Pradesh a·dok, 458.5 point-rangko man·skaahachim.
School Education-o nambatgipa a·dokrangara Chandigarh aro Punjab a·dokrang ong·skaahachim.