U·IATTIMGIPAONI
TURA: Education Ministry-ni 2021-2022 bilsina Performance Grading Index (PGI) rating-o Meghalaya a·dokni bon·kamgipa biapko man·engani gimin a·dokni Education Minister Rakkam A Sangma-ni pa·sikgipa kattarangara ra·chakna man·gijagipa ong·a ine Mongolbar salo, Trinamool Congress (TMC)-ni chadambe dolko dilgipa Richard M Marak matnangataha.
Marak-ni parakatani gitade, ia PGI rating-ko ma·mong sorkarini Education Ministry, a·dokni dingtang dingtang kamrangko niesa on·ahani gimin a·dokna grade-ko on·anio survey ka·giparangko skulrangchi re·ange nieja ine matnanganiara kragijani ong·achim.
“Iana gipinrangko matnange dongaigija a·doko lekka porako namdapatna gitasa sorkari kamko ka·na nanga,” ine Marak parakataha.
Kerala a·dok gita dal·dalgipa a·dokrang baksa Meghalaya a·dokni performance-ko toahani gimin Education Minister-ko matnangatengon, pilak a·dokrangan lekka poraniko on·anio dingtang dingtang gadangrang donga aro PGI rating-o a·dokko tang·doatna gita sorkari, ta·raken ja·kurangko de·na nangengaha ine TMC-ni chadambe dolko dilgipa parakataha.
A·dokni namroro silroroanina lekka porani kamrangara namen mongsonggipa ong·a ine janapatengon, chatro chatrirangna namgipa lekka porako on·na gita sorkari, pilak nanga cholrangko on·na nangchongmota ine Marak parakataha.
“Lekka porakon sorkari mongsongbatgipa ong·e kamko ka·enga ine Education Minister a·kangengoba NPP-chi dilenggipa MDA sorkari lekka porako nichanggalengani a·selsa a·song gimiko namjabatsranggipa ong·enga aro bi·sarang nanga gita lekka porako man·jaenga. Contractual skigiparangko kamoniko ra·galani a·selan skulrango skigiparang chu·ongjaenga aro da·alonan skigiparangko chu·onga gita kamrango ra·kujaenga,” ine Marak parakataha.
Marak-ni parakatani gitade, Meghalaya a·doko lekka porani gita ja·manchakenganiara namen jajrengna nangenggipa kam ong·enga aro iako namdapatna gitade pilakni gitan ja·kurangko de·na nangengaha.
India a·song gimiko Meghalaya a·dokosan skigiparang kamoni neng·takangani ja·manba gital skigiparangko rakkia dongja aro iani a·selan skulrangko chipna nangao ga·akenba skulo poraienggipa bi·sarang lekka pora gri ong·e dongna nangtokenga ineba TMC-ni dilgipa parakataha.