U·IATTIMGIPAONI
SHILLONG: All India Congress Committee (AICC)-ni dilgipa Rahul Gandhi-ko Lok Sabha-oniko champengataniko jegalna gita Budbar salo Meghalaya a·doko Congress dolni dilgiparang aro kamko ka·enggipa manderang, ma·mong sorkarini kosako jegalna gita ‘Silent Protest’-ko Congress Bhawan-o ong·atangaha.
Ia jegale tom·aniko Meghalaya Pradesh Congress Committee (MPCC)-ni dilgiparang, State Secretariat-o donggipa Mahatma Gandhi-ni mangkrong mikkango ong·atna manchiahachim indiba permission-ko man·jahani gimin Congress Bhawan-o ong·atangskaaha.
Ia ‘Silent Protest’ ba tom·tome jegalaniko ong·atani bidingo Opposition dolni dilgipa Ronnie V Lyngdoh, kobor ra·timgiparangna talate on·angengon, Rahul Gandhi-ni kosako Gujarat High Court-ni rai on·aniko jegalna gita ong·ataha ine parakataha.
BJP sorkarini ning·o a·songni economy namen tang·onangaha aro tang·dobapilna gita baditaba bilsirangko nanggnok ine janapatengon, NDA sorkarini chu·sokgijanirangko manderangna u·iatna gita Congress dol, onbatgipa gadangni manderangona re·anggen ine Lyngdoh parakataha.
Manipur-o so·sojengjeng ong·enggipani bidingo ku·rang on·jaengani gimin a·songni Prime Minister Narendra Modi-ko matnangatengon, BJP sorkarini ning·o Manipur a·dokni manderang bang·en duk mikchirangko chakna nangtokengaha ine Opposition dolni dilgipa parakataha.