Shillong: North-Eastern Hill University (NEHU), university baksa bakrimgipa gimik college-rangkon gital academic session August 1 tarikoni undergraduate course-na New Education Policy (NEP) 2020-ko ra·gatchina ba a·bachengna aganataha.
Butbar salo kobor ra·timgiparangna u·iatengon, NEHU-ni vice chancellor Prabha Shankar Shukla, indine aganaha, “university-o gital education policy-ko PG course-na 2022-2023 academic session-onin a·bachengataha. University-o VC-ni kamko jako ra·chengonin, university-o gital education policy-ko ra·gatna jotton ka·aha.”
Uandake badia college-rango NEP 2020-ko ra·gataha, iako u·igijade maidake policy-ko ra·gatanio chu·sokna man·gen ine sing·on, VC indine aganchakaha, “iani bidingo university, college-ni principal-rangko gronge agangrikgen. Policy-ni bidingo chanchirimna gimik college-ni principal-rangna u·iataha. College-rangna chinga training-ko on·na tarie donga. Chinga student ba poraigiparangna namgniko dakna miksonga, ine Prof Shukla aganaha.
Indake ong·engon policy-ko ra·gatanio mitam college-rango neng·nikako chagrongnaba gnang ine ra·chakate, “beben policy-ko ra·gatanio ra·bianirang dongnaba donga, indake ong·ode, changgipingipa academic year-oni a·bachengna man·skagen” ine aganaha.
College-ni Principal-rang, jemangan NEP 2020-ko ra·gatna taria dongkuja ba chanchikujaenga, uamangko, college-o maini gimin ba maidakgipa neng·nika dongani gimin policy-ko ra·gatna man·jaenga, iani gimin talate on·na nanggen.
Niatgenchimode Education Minister Rakkam Sangma, a·doko NEP 2020-ko ra·gatna tarisoani gimin parakatahachim.
Gital policy-ni gita undergraduate program bilsi brina ong·gen, poraigiparang programoni ong·katnaba cholko man·aigen, jeko agangenchimode student ba poraigiparang first year-ni ja·man ong·katna ba dontongna sikode man·aigen, ja·man join ka·tainaba man·gen.
