SHILLONG: Voice of the People Party (VPP)-ni dilgiparangni gisepo obostarang nambeade ong·jaenga, je dolan re·anggipa Assembly election-o ge·bri seat-rangko man·enba manderangko jagokatahachim.
VPP-ni dilgiparangni gisepo meligrikgijanirang ong·enga, jeon koborrango nakatani gitade party-ni dal·batgipa dilgiparangan, mitam dilgiparangkode a·pal gale kamrangko ka·engachim.
Party-ni ning·joljol koborrangko party-o tik ka·chenggija koborna ba mediani mikkango parakani gimin party-ni dal·batgipa dilgiparang kusi ong·tokjahachim, jeon party dilgiparangara, party-ni gita seokgimin manderangchisa media-na parakaniko nangnikachim.
North Shillong MLA, Adelbert Nongrum-ba ma·eke donggiparangoni saksa ong·a. Uni skanggipa changna MLA ong·mitingode aganrakgipa ong·achim. Job reservation policy-ko nipilna agangiparangoni uaba saksa ong·achim.
Indake ong·genchimoba VPP-o napani ja·mande jripjripsajok, jeon party president, Ardent Miller Basaiawmoit-sa jatchio ra·gope kamrangko ka·skaaha. Basaiawmoit-na agreba gipin sakgni dilgiparang, jedake party-ni ku·wattimgipa, Batskhem Myrboh aro general secretary, Ricky AJ Syngkon mangsa media-nade agantimengachim.
Unomitingo basakobasan party vice president, Kara Chen-de mediana ku·parakaiachim. Unomitingo Nongrum, Brightstarwell Marbaniang aro Heaving Stone Kharpran, ia sakgittam dilgiparangde jinmana mikkang pa·anirang dongjaengachim.
Indakeba ma·sina gita man·aha je, roster system-ni bidingo uamang party-ni office memorandum-ni gimin an·tangni chanchianiko media-na Nongrum-ni parakgipani bidingo party dilgiparang suk ong·tokjaha.
Unagre gipin kamrangni bidingo agananirangnaba suk ong·tokjachim
Koboro gitade, re·anggipa somoio Tura-ona mitam party dilgiparangni re·anggipani bidingoba party MLA-rang u·iriktokjaha. Una agreba, North Shillong MLA, batanggimin adita somoirangonin party-ni tom·anirangoba dongrongjahachim.
