TURA: Bilsi 100-na skang Roman oikorchi A·chikkuo segipa golponi poedo ‘Biporinni Katta’ ki·tapko Sonibar salo, A·chik Literature Society (ALS) oprake on·angaha.
Ia golponi peodoko A·chik a·songni salgro jolchipak songdong a·chagipa Pa Chenggan A Sangma, chimonge segattaienba type ka·aha aro iako NEHU-ni gitcham Pro Vice Chancellor Prof Milton S Sangma edit ka·skaahachim.
ALS-ni u·iatani gitade, ia golpoo A·chikrangni janggi tangani, bebera·ani aro maniani bewalrang baksana jatni gitcham golporangkoba bang·en ra·chapaha.
Ia ki·tapko oprakani ja·man, ma·mong sorkarini ra·gatna miksongenggipa Uniform Civil Code (UCC)-ni giminba ALS-ni dilgiparang tom·e chanchirimangaha aro ia niamko ra·gatanichi India a·songni Tribal-rangna aro mongsongbate A·chikrangni chasongni changna ja·rikbaenggipa niam aro bebera·anirangna maiko ra·bagen, uarangni giminba chanchiangaha.
Garo Hills-o lekka porani gita ja·manchakengani giminba ia tom·anio ALS-ni dilgiparang chanchirimangaha aro maikai lekka porako namdapatna man·gen, uarangni gimin chanchiangaha.
