RESUBELPARA: Sukrobar salo, North Garo Hills a·jani Mendipathar-o donggipa Dilma Urban Health & Wellness Centre-ko Mendipathar-ni MLA aro Power department-ni Adviser Marthon J Sangma-ni jakchi do·ga oe on·angaha.
Ia Urban Health & Wellness Centre-ko do·ga oe on·angani somoio Mendipathar MLA, jinmana aganprakangengon, ia Dilma Urban Health & Wellness Centre-ko kulianiara jolo songdongenggipa manderangna nambata sanna banani cholrangko on·na gita sorkarini ja·ku de·ani ong·aha ine parakataha.
“Ia health & wellness centre-o manderangna nambatsranggipa sanna bananirangko on·na man·gnok aro manderang nanggitikan somoirangoba sannanirangko ra·na aro samrangkoba indin ra·na man·gnok,” ine Sangma aganaha.
Ia centre-ara manderangni gam-jinan ong·ani gimin an·tangtangni namgnina jakkalna nanga ineba ua jolo songdongenggipa manderangko didiangaha.
Ia tom·anio, North Garo Hills a·jani Additional Deputy Commissioner (ADC) Kapil Koch-ba dongpae jinmana aganprakangengon, ia urban health & wellness centre-rangara Ayushman Bharat-ni ning·o songni nokni manderangna sanna bananirangko on·na ra·gatgipa scheme ong·a ine talataniko on·angaha.
Ia Dilma Urban Health & Wellness Centre-ko do·ga oe on·angani somoio dongpae jinmana aganprakanggipa gipin manderangara, North Garo Hills a·jani DM&HO Dr Sombari Boro, Dilma songni Sordar aro gipinrang ong·a.
