SHILLONG: Re·baenggipa 2024 bilsini gisepon Khasi aro Jaintia Hills Autonomous District Council (KHADC aro JHADC)-ni election-kode ong·atna siengahani gimin ia election-na National People’s Party (NPP) tarisamsoengaha ine u·iataha.
KHADC-ni MDC aro NPP-ni dilgipa Bajop Pyngrope-ni kobor ra·timgiparangna parakatani gitade, re·baenggipa bilsion KHADC aro JHADC election-ko ong·atna siengahani gimin iana NPP-na kam ka·giparang, da·onin kamrangko ka·chichana a·bachengtokengaha.
“NPP-ni party worker-rang, kamrangko ka·na a·bachengtokengaha aro chinga iana tarisamsoani bak gita constituency damsaoni damsaona re·rurae kamrangko ka·engaha,” ine Pyngrope parakataha.
KHADC aro JHADC election damgnion, NPP bang·bata seat-rangko chena ka·dongsoenga ine janapatengon, ia bilsini Assembly election-o amako man·gipa constituency-rangoba NPP-ni candidate-rang bang·gija vote-rangchisa amako man·aiahachim ine Rambrai-Jyrngam-ni MDC parakataha.
“Je constituency-rangon chinga bang·gija vote-rangchi amako man·ahachim, uandakgipa constituency-rango chinga bilakbate kamrangko ka·gen aro ia changode chinga nambate dakna ka·dongenga,” ine NPP MDC aganaha.
Ua an·tangni Rambri-Jyrngam constituency-onin susataigenma ine sing·anina aganchakaniko on·angskaengon, ua pangnan constituency-ni manderangosa sing·chengrongani gimin ia changoba manderangni skaniosa ong·aigen ine Pyngrope parakataha.