SHILLONG: Tetelia-Byrnihat-Shillong rel ramako tariani kamrang da·o bon·chipengahaoba mikkangchi a·dok sorkari, rel ramarangko taribana skanirang donggenchimode ine Northeast Frontier Railway (NFR), a·dokni km 400-mangni gita biaprangko survey ka·manskaaha ine u·iataha.
NFR official saksani parakatani gitade, Jaintia Hills gita Shillong-oni Dawki-ona aro Tura baksana Mendipathar railway station-ko nangchapate rel ramako tarina NFR, dingtangmancha survey-ko ka·manaha.
Shillong-oni Sohra-ona railway project-ko ra·gatani giminba NFR, cholrangko nimanaha indiba a·dok sorkari nangnikgenchimosa ia pilak project-rangan chu·sokgipa ong·na man·aigen ineba NFR official parakataha.
Railway project-na survey-ko ka·anio bang·en somoirangko nangani giminsa ia project-rangna NFR, survey-rangko ka·samsoe donaha ineba official parakataha.
Garo Hills-o rel ramako bakrodapatani gimin janapatskaengon, a·brirang donggenchimoba maming neng·nikanirang dongjawa inen Tura-onaba rel ramako bakrodapatchina gita NFR, changni chang a·dok sorkarina u·iatahachim aro da·ode Garo Hills-o rel ramarang dongmanahani gimin darangba jegalgiparang dongjawahachim ine official parakataha.
Indake ong·genchimoba, official-ni parakatani gitade, rel ramako Tura-ona bakrodapatna gita a·dok sorkari maming gisik nanganiko mesokjaha.
Tetelia-Byrnihat-Shillong project-ni gimin sing·on, ia project-ko chipna gita da·o dipet a·dok sorkarioni maming proposal-rangko on·a dongkuja ine NFR official parakatskaaha.