AMPATI: South West Garo Hills a·jani Ampati-o Urban Health & Wellness Centre-ko Sukrobar salo, Mahendranganj-ni MLA Sanjay A Sangma, nokdonggae on·angaha aro ia tom·anio, Ampati MDC Stevie Marak, Zikzak MDC Aktar Ali, South West Garo Hills a·jani Deputy Commissioner RP Marak, Superintendent of Police (SP) V Kumar, Betasing-ni BDO CRN Sangma, Ampati Mondolini Pamong WG Sangma aro South West Garo Hills a·jani DM&HO Dr H Barman-ba dongpae bak ra·angaha.
Ampati-o ia Urban Health & Wellness Centre-ko nokdonggae on·angani somoio Mahendraganj-ni MLA Sanjay A Sangma, jinmana aganprakangengon, manderangni namgnina ia health centre-ko kulina man·ahani gimin Nokgipa Isolko, Meghalaya sorkariko, District Administration-ko aro Medical department-ko mittelpilangaha.
An·tangtangni namgnina kam ka·anio medical-ni manderang, Integrated Child Development Services (ICDS) aro dingtang dingtang dolrang baksa bakrimchina gita songni nokni manderangko didiangengon, ia jolrango ambulance-ko on·china aro blood bank-ko kulichina dabienggipani bidingo ua a·dokni Chief Minister baksa agangrike, iarangko chu·sokatna jotton ka·gen ine Sangma ku·rachakaniko on·angaha.
Ia tom·anio South West Garo Hills a·jani Deputy Commissioner RP Marak-ba jinmana aganprakangengon, hospital-rango an·pakaniko bariatna man·ahani gimin ua a·jani manderangko mittelpilangaha. MHIS-ni ning·o namgnirangko ra·na gita Aadhar baksa link ka·na nangengani giminba ua songni nokni manderangna agan-talate on·angaha.
Ia tom·anio SWGH a·jani DM&HO Dr H Barman-ba jinmana aganprakengon, 15th Finance Commission-ni ning·o ia Health & Wellness Centre-ko rikna man·aha ine parakataha.