Cheristerfield-ko so·otani bilsigni gapa, nokdangni manderang kakket bichalna sengkuenga

SHILLONG: Hynniewtrep National Liberation Council (HNLC)-ni gitcham general secretary Cheristerfield Thangkhiew-ko police-rangni so·ote galani mijal Robibar salo bilsigni gapaha indiba uni nokdangni manderang da·onan kakket bichalko man·skakujaenga.
Thangkhiew-ko 2021 bilsini August 13 tariko police-rang, uni nokona re·ange chadrapeani ja·man, uko so·ote galahachim ine nikna man·a.
Thangkhiew-ni siani salo, uni nokdangni manderang, Lawmali-o donggipa Church of God-ni gopramona re·ange, una pulrangchi mande ra·pilskaaniko dakangaha.
Thangkhiew-ni nokdang baksana dingtang dingtang dolrang aro uni nokdangna chakpaenggipa manderangba dongpaaha.
Thangkhiew-ko so·otani bidingo uni jonggipa Granary Starfield Thangkhiew, kobor ra·timgipa manderang baksa agangrikengon, uamang kakket bichalko man·kujaskal dakgrikangkugen ine parakataha.
Uamangni dabianirangko sorkari knachakjawa ine ma·siani gimin uamang iani bidingo CBI inquiry-ko dakchina gita High Court-ona re·angaha ineba Granary parakataha.
“Cheristerfield-ni sianiko CBI inquiry dakchina dabie chinga a·dokni Chief Secretary-na sedoatahachim indiba sorkarioni maming aganchakanirangko on·jaha,” ine Thangkhiew aganaha.
Granary-ni parakatani gitade, uni adatangko so·otna gita sawa ge·etaniko on·aha, uko uamang ma·sina nangnikengani giminsa ia a·selni bidingo CBI inquiry-ko dakchina dabiengachim.
Justice T Vaiphei-ni dilanichi inquiry commission-ni sandie man·aniko uamang chu·onikachim indiba inquiry commission-ni ku·pattianirang gita sorkari ja·ku de·jaengani gimin suk ong·ja ineba ua aganaha.
Re·anggipa 2021 bilsio HNLC bobil dolni gitcham general secretary Cheristerfield Thangkhiew-ko rim·na gita police-rangni uni nokko chadrapeanio, police-rangni chanchininggija aro nangana bate bilko jakkale ja·ku de·ahani a·selsa ua sina gita nangaha ine Justice T Vaiphei-ni inquiry report-o parakatahachim.
HNLC bobil dolni gitcham general secretary Cheristerfield Thangkhiew-ko police-rangni pringwal 3:00 bajio rim·na re·anganiara chanchininggija kam ka·aniko mesokani ong·aha aro police-rang bilko nangana bate jakkaljagenchimode uko sianiona sokatjawachim ine ia a·selni bidingo inquiry dakgipa commission-ni report-o parakahachim.
Thangkhiew-ni nokko chadrapegipa police dol, kontagnimangna sengkuenba seng·bana on·chenge, sianggipa mande aro uni nokdangni kuturirangchi teargas grenade-ko goatgenchimode, nokni manderangko ong·katchina draatgnokchim aro unode sianggipa mandeko altuaen rim·na man·genchim aro uni nokdangni gipin manderangnaba naljokaniko on·na man·genchim ineba Inquiry Commission-ni report-o parakahachim.