TURA: Tura-ni Don Bosco College-o A·chik Folk Art-ni Certificate Course-ko re·anggipa Sonibar sal dipet a·bachengataha.
Ia course-ko Don Bosco College-ni Internal Quality Assurance Cell (IQAC)-ni ning·o, English aro Garo department-rang chalaienga aro ia course-ni session-ko a·bachengatani salo, NEHU Tura campus-ni ning·o donggipa English Department-ni Head, Prof Dwijen Sharma, mongsonggipa sokgipa ong·e bakko ra·angaha.
Ia session-ko a·bachengatanio Prof Sharma, tom·anio bak ra·giparangna aganprakangengon, pagitcham ma·gitchamrangni daka rikanirangni gimin aganangenba, iandakgipa kamrangko jako ra·asan ong·aigija ia kamrangko tange rakkichina gita didianiko on·angaha.
Ia program-ko ong·atanio Dr Barbara S Sangma, keynote address-ko on·angskaengon, folk art & craft-ni bidingo chatro chatrirangna aro program-o bak ra·giparangna agan-talate on·angaha.
Ia tom·anio Tura Don Bosco College-ni Principal Fr Bivan Rodriqes Mukhim-ba dongpae jinmana aganprakengon, A·chikrangni daka rikaniko ripingna aro skie on·na gita kamko ka·engani gimin ia department ge·gniko mittelpilangaha.
Ia certificate course-ko on·anio pilak nanga dakchakanirangko on·na gitaba ua ku·rachakaniko on·angaha.
Ia program-ko ong·atanio, chatro chatrirang, gitcham A·chik gitrangko ring·e manderangko an·saoatangaha.
Iana skang, ia Certificate Course-ni Coordinator Dr Colnat B Marak-ba jinmana aganprakangengon, ia course-ni miksongani aro syllabus-ko talate on·angaha.
