TURA: West Garo Hills a·jani a·kawe jolrango Selsella, Demdema aro Tikrikilla block-ni ning·o donggipa dingtang dingtang songrango Awas Plus PMAY-G-ni nokrangko man·kujaengani a·sel da·o gita chi banani somoirango songni manderang neng·nikanirangko chagrongna nangtokenga ine All Meghalaya Minority Students Union (AMMSU) matnangataha.
Iani bidingo West Garo Hills a·jani Deputy Commissioner-na badi ka·e sedoatengon, West Garo Hills a·jani Selsella, Demdema aro Tikrikilla block-ni ning·o donggipa dingtang dingtang songrango bang·a manderangan PMAY-G scheme-ni nokrangko man·tokkujaengani a·sel an·tangtangni rikgipa ramram nokrangon dongna nangtokenga ine AMMSU parakataha.
“2020-21 aro 2021-22 bilsini Awas Plus PMAY-G-ni DBT-ko bang·bata nokdangrangan man·tokkujaenga ine anga koborrangko man·soaha. Ia nokdangrang, ia scheme-ni ning·o rike on·gipa nokrangko man·kujaengani a·sel da·o gita chi banani somoirangoba ramram nokrangosa dongna nange, kenna nanganirang ong·enga. Uni gimin 2020-21 aro 2021-22 bilsini DBT-ko ta·raken ia nokdangrangba man·china gita kamrangko niatchina anga nang·ko mol·molenga,” ine Deputy Commissioner-na sedoatgipa chittio, AMMSU-ni president parakataha.