CM Elevate program-ni ning·o dingtang dingtang dolrangna 30-75% subsidy donggen

SHILLONG: Meghalaya sorkarini gital ra·gatgipa Chief Minister’s Elevate program-ni ning·o, bading chiwalgiparangna, self help group (SHG)-rangna aro uandake an·tangtangko dakchakenggipa dingtang dingtang dolrangna 30 percent-oni 75 percent-ona kingking subsidy-rangko on·ani donggen ine Budbar salo, a·dokni Chief Minister Conrad K Sangma parakataha.
Gipin biaprangoni re·baenggipa tourist-rangko sokachakna gita Mawphlang-ni Kyiem songo rikgipa ‘Travellers Nest’-ko nokdonggae on·angani somoio iako Chief Minister, jinmana parakataha.
“Ia CM Elevate program-ni mongsonggipa miksonganiara, a·doko cinema hall, health club aro tourism project-rangko jako ra·enggipa dingtang dingtang dolrangna aro bading chiwalgiparangna dakchakanirangko on·anian ong·enga,” ine Sangma aganaha.
A·doko rama jal·langrang nambatrorobaengaha ine janapatengon, Mawphlang-oni Weiloi-ona rama tarianian a·doko rama jal·langrangko namdapatna gita sorkarini rake kam ka·aniko mesokani ong·enga ine Chief Minister parakataha.
A·dokni namroro silroroanina kamko ka·anio sorkari aro a·doko songdongenggipa manderangni daitorangni gimin janapatengon, an·tangtangari kamko ka·anichide maming kamon chu·sokna gita man·jawa aro pilakan an·tangtangni daitorangko ma·sie jakko on·pana gita nanggen ine Sangma aganaha.
Tourism-ni kamrangko namdapatani gimin janapatengon, ‘Travellers Nest’ gita dakgipa kamrangchi a·doko Tourism tang·dobarorona man·gen ine Chief Minister, an·tangni ka·dongchakenganiko parakataha.
“Manderangni bilrangchi a·doko tangka paisani gita namroro silroroaniko gipinrangna dakmesokna gita sorkari kamko ka·enga aro a·dokni bilrango pangchake manderangna janggi tangani cholrangko on·na sorkari kam ka·enga,” ine Sangma aganaha.
Ia ‘Travellers Nest’-o gipin biaprangoni re·bagipa tourist-rangko sokachakna gita nok te·bonga aro restaurant-ko rikahachim.
Ia ‘Travellers Nest’-ko kulie on·angani somoio a·dokni Tourism Minister Paul Lyngdoh aro gipin dilgiparangba dongpae bak ra·angaha.