SHILLONG: Uniform Civil Code (UCC)-ni chu·gimik niamrangko name poraichenggija aro tale ra·chenggijade ma·mong sorkarini kamko jegalsona gita Meghalaya Legislative Assembly-o resolution-ko ra·na man·jawa ine Budbar salo, a·dokni Chief Minister Conrad K Sangma parakataha.
Ma·mong sorkarini ra·gatna miksongenggipa UCC-ko jegalsona gita resolution-ko ra·na nanga ine dabienggiparangna aganchakaniko on·angengon, UCC-ni niamrangko name poraie nichenggija aro name talchenggijade Assembly-o resolution-ko ra·na man·jawa ine Chief Minister parakataha.
“Ia UCC-ara namen apalbegipa chanchiani ong·engani gimin ia Bill-ni bidingo chingnaba seachi u·iatchengna nanggen,” ine Sangma aganaha.
Iako ra·gatna chanchianiara a·songo dingtang dingtang jat aro toromrangni ku·mong nangrime donganiko pe·ani gita ong·enga indiba uamangni aganenggipa UCC-ara maiko miksongmanchaenga ukoba ma·sichengna nanggen ine Chief Minister parakataha.
Ia Bill-ni bidingo chu·gimikko name poraie ma·sichengani ja·mansa a·dok sorkari, resolution-ko ra·gen ineba Chief Minister parakataha.
UCC-ni bidingo seanirangko name nichenggijade UCC-ni gimin agananiara maming orto dongjawa ineba ua media-na aganaha.
“Uni gimin da·o dipet dongkugijagipa kamni gimin an·ching agangrikjana. Ian da·o dipet chanchianisan ong·engkua aro bimang ong·na man·kujaenga. Ia Bill-ko an·ching ma·sichenggijade UCC-ni gimin mamingkoba aganna man·kujawa,” ine Sangma aganaha.
