SHILLONG: Intelligence-ni kobor on·anio pangchake a·dokni police-rang, mitam Khasi-Jaintia chadamberangni gital bikotgipa ‘National Liberation Council of Nongkyndong’ (NLCN) minggipa bobil dolko rim·na man·aha.
Koborko man·soani ja·mano police-rang, a·dokni salaram jolo donggipa dingtang dingtang biaprangoniko am·sandienba, bilsi sokkugijagipa chadambe saksako man·chape ia dolni gimik saksni membor-rangko rim·na man·aha ine kobor on·aha.
Eastern Range-ni Deputy Inspector-General of Police (DIG) Davis Nestell Rangsa Marak-ni parakatani gitade, rim·ako man·gipa manderangara, ia gital NLCN-ni chairman, commander-in-chief, general secretary, West Khasi Hills aro Jaintia Hills-ni area commander-rang, bobil dolna mande rimtimgipa, record rakkigipa aro gipin sakgittam membor-rang ong·a.
Sorkarini kosako chakate so·sojengjeng ong·atani kamrangko ka·na, silchidarerangko ra·e ma·manti ong·gija kamrang, jekai tangka dabie ra·na, bobil dolo manderangko rimnapna, dolni membor-rangna silchidare jakkalaniko skie on·na, bobil dolni a·tiprangko songna aro uandakgipa ma·manti ong·gija kamrangko ka·na miksonganiosa ia gital bobil dolko bikotahachim ineba Marak parakataha.
“Intelligence-ni kobor on·ani gitade, ia gital NLCN bobil dol, Nagaland a·dokni gipin bobil dolrang baksaba bakrimani dongahachim aro ia dolni skanggipa batch-ko August-ni 17 tarikon training-na Nagaland a·dokona watatna miksongengachim,” ine Marak aganaha.
Ia bobil dolni kam ka·enggipa biaprangni gimin koborko man·soani ja·man police-rang am·sandiangenba, ia bobil dolni mobile phone-rang, lekkarang aro ma·manti bosturangko man·aha ineba Eastern Range-ni DIG parakataha.
“Ia gital NLCN bobil dolni gipin membor-rangkoba da·o rim·na gita sandienga aro ia case-ni bidingo sandirokanirangkoba dakengkua,” ine Marak aganaha.
Iani bidingo police-rang, Indian Penal Code aro Unlawful Activities (Prevention) Act-ni dingtang dingtang niamrango pangchake, Eastern Range-ni Crime Branch police station-o criminal case-ko segataha ineba Marak parakataha.