U·IATTIMGIPAONI
RESUBELPARA: North Garo Hills a·jao sorkarini kamrangna manderangko ra·anio dakchake on·na gita a·dok sorkari, dingtangmancha sakgittam non-official membor-rangko songe on·aha.
North Garo Hills a·jani District Selection Committee (DSC)-ko Deputy Commissioner Mitali Chandra, chairperson ong·e dilenga aro ia committee-o additional deputy commissioner Jude Rangkhu T Sangma, membor secretary ong·engachim. Indake ong·engon, da·o DSC-ni kamrango dakchake on·na gita Resubelpara-ni Pangsik G Momin-ko vice chairman, Mendipathar-ni Algore D Shira aro Kharkutta-ni Henry Lamin Momin-koba DSC-ni membor-na songaha ine kobor on·aha.
Koborko on·ani gitade, DSC-ni vice chairman-na songako man·gipa Pangsik G Momin-ara, Resubelpara-ni MLA aro Meghalaya Legislative Assembly-ni Deputy Speaker TD Shira-ni depante ong·a, DSC-ni membor-na songako man·gipa Algore D Shira-de Mendipathar MLA Marthon J Sangma-ni depante ong·skaa aro DSC-ni sakgipin membor Henry Lamin-ara Kharkutta MLA Rupert Momin-ni nangchapgipa mande ong·skaa.
Ia gital membor-rangko bilsignina DSC-o kamrangko dakchakna gita songaha ineba kobor on·aha.