U·IATTIMGIPAONI
RESUBELPARA: North Garo Hills a·jao ra·gate ka·enggipa ma·mong sorkarini dingtang dingtang scheme-rangko Bristibar salo, Road Transport, Highways & Civil Aviation-ni Union Minister of State Gen VK Singh (Retd), North Garo Hills a·jani District Administration aro dingtang dingtang department-ni officer-rang baksa Mendipathar-ni Multi Purpose Cooperative Society Hall-o nipilangaha.
Ia scheme-rangko nipilangani somoio Gen VK Singh, North Garo Hills a·jani officer-rang baksa chanchirimangengon, Meghalaya a·doko bang·en namroro silroroaniko nikna man·engahani gimin ian a·dokna ma·mong sorkarini gisik on·aniko mesokani ong·enga ine parakangaha.
Namroro silroroaniko ra·bana gita namgipa rama jal·langrangko, an·seng baljokaniko, skie on·chakani biaprangko, chi, bijoli aro uandakgipa kamrang namna gita nanga ine janapatengon, sorkarini scheme aro project-rangko chu·sokatna gita pilakan nangrime kamko ka·na gita nanga ine Union Minister parakataha.
Ia tom·anio North Garo Hills a·jani MLA-rang, chong·motan Mendipathar-ni MLA Marthon J Sangma aro Kharkutta-ni MLA Rupert Momin-ba dongpae bak ra·angengon, North Garo Hills a·jao chagrongna nangenggipa dingtang dingtang neng·nikanirang aro nanganirangko Union Minister-na talate on·angtokaha.
2008 bilsi dipetan a·bachengna man·chipgija dongenggipa Baljek Airport-ko ta·raken a·bachengatna man·na gita kamrangko dakchakatchinaba MLA-rang, Union Minister-ko didiataha.
Ia tom·anio North Garo Hills a·jani Deputy Commissioner Mithali Chandra-ba aganprakengon, a·jao chu·sokatna man·gipa kamrangni gimin aro chu·sokatanio chagrongna nangenggipa kamrangni bidingo Union Minister-na talate on·angskaaha.
Iani ja·mano, Road Transport, Highways & Civil Aviation-ni Union Minister of State Gen VK Singh (Retd), Mendipathar PHC, Dilma A·pal Higher Secondary School aro Gajingpara-ni Jamgao Anganwadi-ona re·ange niangaha.