U·IATTIMGIPAONI
SHILLONG: Mnisalo Shillong-o a·sel ong·anio bike-ni ta·rake sallange salgakkanio mandeni bangbang tang·ako nikna man·aha, uarang police-ni nitimani dongjamiting somoio simsakgija salani a·sel ong·aha.
Ia a·sel ong·aniko nikna man·ani gita police skango gita nirok nitimanirangko dakjaha, unsomoirango Shillong-ni dingtang dingtang biaprango gari salgiparango driving licence ba gipin document-rang dongama dongja, uni gimin sandianiko dakrongachim.
COVID-ni ja·man city-o driving licence aro gipin document-rang donga dongjani gimin nirok sandiani namen komiaha, indiba mijao nikna man·ani gita chadambe rider an·tangni gimin aro sakgipinni gimin simsakgija salako nikna man·aha.
Meghalaya police-ni re·anggipa bilsini statistic-ni gita, sak 162 manderang rama a·sel ong·anio siaha, unoni sak 136 me·asarang aro sak 26 me·chikrang ong·aha. Sak 310 manderang rama a·sel ong·anio saknaa man·aha.
Statistic-ni gita 2 wheeler ba chakka samgni gari a·sel ong·anio sak 50 siaha, aro sak 59 manderang re·anggipa bilsi mangmangon saknaa man·aha.
Bilsi 2021-o sak 146 manderang rama a·sel ong·anio siaha, unoni sak 131 me·asarang aro sak 15 me·chikrang ong·aha. Saknaa man·giparang sak 181 gapaha.
Apsan bilsion chaka samgnini a·sel ong·anio sak 29 manderang siaha aro sak 33 manderang saknaa man·aha.
Nikna man·ani gita salgiparang simsakgija skele salni a·selba ong·na man·aha aro Shillong-o bang·a 4 wheeler driving institute-rang dongaha, indiba 2 wheeler-ni dongkujaenga.