U·IATTIMGIPAONI
SHILLONG: Koela cho·na champenga man·gipa manderangna jemangan chasongni chasongna ianon pangchake janggi tangbaengiparangna tangka paisarangko on·anganichi nambatgipa gadangko ma·mong on·angchongmotna nanga, ine NPP-ni state president aro Rajya Sabha member, WR Kharlukhi Sukrobar salo aganangaha.
“Manderangna ma·mong adita tangka paisarangko on·e dakchakangna nangchongmota. Uamangni koela cho·ako tanggitik dondipataha maina chinga salgro salaram a·dokrangoni chel·a,” ine ua aganangaha.
Jaintia Hills a·jao donggipa manderangna koela cho·animangmangsan janggi tangna cholko man·paigipa ong·a aro uamangni man·ani aro cha·anina uamangni jakgitele kam ka·angani bilko iano champengenga ine Kharlukhi aganaha.
“Bilsi 40-na uamang iako dake cha·baenga. Jensomoio angani manderangni kangal ong·ani na·a maming dakeba chanchija indiba jensalo uamang man·e cha·baaha uamagngni kamrang niam grigipa ong·aha,” ine ua aganaha. Koela cho·na pengani ja·manoba niamgri mese a·kol dake koelarangko cho·kuengani bidingo ua aganangaha, “Me·asarang kenbegnigipa kamrangko ka·enga maina uamang uamangni nokdangko aldu-mitangna nanga.”
Adita mandereangkosan man·e cha·ata ong·ja pilak songsalni section-rang bak dongpaange koela cho·angani a·dokni economy-ko bilakata, ine Kharlukhi aganangaha.
“Kosakgilgil champenggipa pindapaniko uamang jegalaha maina ian Meghalaya a·dok ong·a. Apsankon a·songni skotong songjinma Delhi-na toe aganangaha jeon namgijagipa balwarangko ong·katata,” ine ua Parliament-o changgnina iani bidingo sing·doangna uni jotton ka·ani ong·gramaianiko agandapangaha.
Mai gamchatani dongkuenga janggi tangna manderang koela-ko cho·kuenga ong·ode, ine Kharlukhi scientific tangkana okamani bidingo aganangaha.
“Meghalaya-na maidakgipa obosta ong·enga iako nike bilongen saknaa maina koela-ko cho·na champengaha,” ine ua aganaha.