U·IATTIMGIPAONI
SHILLONG: A·dokni dakchakanichi poraigipa Meghalaya-ni doctor-rang gimikan da·o State Medical Council (SMC)-o register ka·na nanggnok ine a·dokni Health Minister Ampareen Lyngdoh parakataha.
A·dokni dakchake on·ako man·gipa doctor-rang iana skangde gipin biaprangosa register ka·rongachim ine janapatengon, a·dokni doctor-rang da·o SMC-o register ka·na nangtelengahani gimin ian MBBS chatro chatrirangko nambate nirokna gita health department-na dakchakani ong·gnok ine Lyngdoh parakataha.
“Da·o dipetde MBBS matchotgipa doctor-rang jeba, licence-rangko ra·na gita gipin a·dokrangonasa re·angtokenga indiba da·ode licence-rangko an·chingni medical council-an on·gnok,” ine Lyngdoh aganaha.
A·dokni dakchakaniko man·eba a·doktango kam ka·na gita re·bapilgijagipa mitam doctor-rangni gimin janapatengon, uamang tangka paisarangko gamskana nanggen ine Health Minister talataniko on·angaha. Tangka paisa gampilani niamko batanggimin cabinet-rangan ra·gatahachim ineba ua aganaha.
“Iandakgipa kamrangna India sorkari bond-ko ra·china ku·pattianiko on·aha. Angni kobor man·ani gitade, MBBS-na da·o gong lak 30 aro specialist-rangna gong kror 1 ong·aha. Ia kamrangko an·chingni SMC-an nianggen,” ine Lyngdoh aganaha.
Iandakgipa doctor-rangni kosako Health department ja·kurangko de·chakataha aro da·o mikkangchide rakbate ja·kurangko de·anggen ineba Health Minister parakataha.
“Adita salrangna skangsan bang·a doctor-rangan register ka·e a·doko kam ka·na re·batokaha. Uamangoni mitamrangde post graduation-ona re·angna gita NEET-ko pass ka·na nangaha. SMC-o register ka·ani tarikni biding ua name am·sandianggen,” ine Lyngdoh parakataha.