U·IATTIMGIPAONI
SHILLONG: Lok Sabha poll-o Shillong-oni ua susaangenga aro iani bidingo file ka·angna party chanchigen, ine TMC-ni vice president George B Lyngdoh Sonibar salo aganaha.
Shillong parliamentary seat-oni Lok Sabha-na candidate ong·na uni bimingko TMC-ni State President Charles Pygrope-ni mingangani ja·man iarang nakataha.
“Ian president-ni gisiko skani mingsa ong·a iana uni gita janapanina anga bilongen mande ra·a indiba apsan somoio chinga apsan jinma asonge agangrikgen aro party-ni gita chanchianiko ra·anggen,” ine Lyngdoh aganaha.
Biming minggipako namnikgenma ma namnikjawa iani bidingo da·o maming dakeba aganna man·kujawa ine ua aganaha.
“Anga party-na kam ka·anggipa ong·a aro iarang pilakan party-osa pangchakaia angni gitade maming ma·simanchae dakate dongja uni gimin nina iani bidingo party maidake chanchigen,” ine idea-na ua parak ong·e agana ong·ode ine sing·anina ua aganchakangaha.
Lok Sabha seat-na Shillong-oni candidate ong·na party-ni vice-president Geogre B Lyngdoh mijamangmang Pyngrope bimingko parakataha, Tura parliamentary seat-na chanchiangna party-ni president Mukul Sangma-ni jako pakwatangaha.
Shillong aro Tura seat-rango party susaanggen indiba state unit TMC general secretary-ko jako ra·e ka·gipa Manas Ranjan Bhunia baksa poll-na chanchianiko agangrikangkuja ine Pyngrope aganaha.
NPP doloni MP Agatha Sangma Tura seat-o chakatangpilna ka·dongsoenga. Party-ko dilenggipa uni adatang aro Chief Minister-ni gita Shillong seat-na candidate-ko parakatkujaenga.
Ge·gipin Congress dol brigipa changna Shillong seat-o Vincent H Pala-na on·angtaina ka·dongsoenga. Tura-na candidate-ni bimingko parakatna party chanchikuja.
2024 bilsio parliamentary poll-na Shillong seat-oni general secretary Ricky AJ Syngkon-ko candidate-na Voice of the People Party parakataha.
