U·IATTIMGIPAONI
SHILLONG: Meghalaya Police-oba engineering wing-ko kulina gita Mongolbar salo, a·dokni Cabinet ra·chakangahani gimin da·ode police department-oba nokrang aro office-rangko department-tangni engineering wing, kamrangko nirokanggnok.
Ia engineering wing-ko Meghalaya a·dokni skotong Shillong songjinmao donggipa Meghalaya Police-ni headquarter-o kulina Cabinet ra·chakangaha.
Mongolbar salo, Cabinet tom·a matchotani ja·man kobor ra·timgipa manderang baksa agangrikengon, “Police-rang, a·dokni pilak biaprangon nokrang bang·en donga aro ia nokrangko aro office-rangko nambate nirokna gita police department-na engineering wing-ko nangengachim,” ine a·dokni Chief Minister Conrad K Sangma parakataha.
Chief Minister-ni parakatani gitade, police department-o engineering wing dongkujani a·selan dingtang dingtang niamrangko ja·rikna gita nangengachim aro uandaken chonchongipa kamrang, jekai bathroom-rangko taridapani, thanarangko taridapani ba barrack-rangko rikanioba bang·en somoirangko nangrongengachim.
“Uni gimin da·o ia pilak kamrangkon Police department-ni engineering wing, jako ra·e ka·na man·gnok,” ine Sangma aganaha.
Iana skangba sorkari, a·ja ge·antinan adita tangkarangko chamenba, da·o gita nanggitikan somoirango taridapna nanganirangko taridapna man·na gita mitam tangkarangko Superintendent of Police (SP) ba Deputy Commissioner (DC)-ni jako donna tik ka·ahachim ineba Chief Minister parakataha.
“Da·alo jekon Cabinet ra·chakaha, ian kamrangko nambate ka·na aro nangani kri ja·kurangko de·na chol ong·gnok,” ine Sangma aganaha.