U·IATTIMGIPAONI
TURA: Ramao a·sel ong·aniko chagrongenba ja·ao saknaanirangko man·gipa me·chikma saksa, jean tangka paisarang dongjae sanna bananirangko ra·anio neng·nikanirangko chagrongna nangengachim, ia me·chikmana Whatsapp group dolsa, tangka paisani gita dakchakanirangko on·e sanna bananirangko on·na gita man·aha.
Koborko on·ani gitade, West Garo Hills a·jani Garobadha jolo donggipa Gongglanggre songoni bilsi 45 ong·gipa Rima Momin, Byrnihat-o a·sel ong·aniko chagronge, uni ja·ao bilongbee saknaanirangko man·na nangahachim. Ia me·chikmako saksa Carla Sangma minggipa mande, Byrnihat CHC-ona rimangaha aro uano doctor-rang, uko NEIGRIHMS-ona ra·angskachina aganataha.
Indake ong·genchimoba, ia me·chikmao tangka paisarang dongjani a·sel aro uni nokdangni manderangna contact ka·na man·jahani a·sel ia me·chikko NEIGRIHMS-ona ra·ange sanna bananiara ong·na amgijani ong·engachim.
Uandaken ia me·chikko sanna gita maming cholrangko nikjae dingtang dingtang social media group-rango dakchakanirangko bi·na a·bachengataha aro uandaken bon·kamao, Tura-oni Whatsapp group dolsa, ia me·chikmana dakchakaniko on·na gita ku·rachakataha.
Ia Whatsapp group-ni bimingara ‘We Are The World’ ong·achim aro ia group-ni membor sakantian, an·tangtangni man·a gita on·giltoke, ia me·chikko sanna gita tangka paisarangko on·ataha.
Da·o ia me·chikmako NEIGRIHMS-o done sanengaha ine group-ni membor-rang, kusi ong·aniko parakataha.