U·IATTIMGIPAONI
WILLIAMNAGAR: Garo Hills-o sak 300-mangna baten manderangna kamrangko on·na ku·rachake, gong lak 38-mangni gita tangka paisarangko cha·boke ra·gipa Delhi-ni mande saksako police-rang rim·na man·aha.
Koborko on·ani gitade, ia mandeni bimingara Hemant Kumar Pradhan ong·achim aro uko police-rang, New Delhi-oniko rim·na man·aha.
Ia mandeni kosako badi ka·gipa manderangni parakatani gitade, re·anggipa bilsio ia mande, ‘Shiksha Barta New Delhi’-ni ning·o bilsi 15-na education awareness program-rangko ong·atna gita Mondoli aro gipin membor-rangni donggipa dolsa NGO-ko tik ka·chengahachim.
Ia mande, an·tangni education aro media company gita Garo Hills gimiko sak 300-na baten manderangna kamrangko ka·e cha·na cholrangko on·gen ine ku·rachakaha aro bang·a manderangan uni iandakgipa ja·gao ga·akna a·bachengtokaha.
“Ian Garo Hills-o lekka poraniko namdapatna aro janggi tangani cholrangko on·na dakchakani ong·gen ine chinga nikenba namen kusi ong·aha aro chingni ‘District Socio Economic Development Organisation (DSEDO) NGO gita chinga ia cholko manderangna on·na gita dakchakna tik ka·aha,” ine DSEDO-ni secretary James Thuimai parakataha.
“Uni u·iata gitan chnga manderangko chimongna aro ia jolrango lekka porako tang·doatna gita kamrangko a·bachengataha. Chingna ua ming 275 field worker-rang aro ming 28 administrative staff-ko man·chape dingtang dingtang kamrangko u·iataha aro ia kamrangna dormaharangara japrako gong 5000-oni gong 13,000/-ona kingking ong·achim. Ia kamna lak 2-ni insurance baksana bilsiprakni man·dapanirangba dongachim indiba ia kamrangna gong 15,540-ko training/security charge dake gamskana nangachim,” ine Thuimai parakataha.
Iani ja·mano DSEDO, ia kamrangna dingtangmancha advertisement-rangko on·na a·bachengataha aro bang·a manderangan ia kamrangna training-ni tangkarang baksa dorgastorangko galna a·bachengtokaha.
Manderangni ka·donganiko man·na gita ia mande, dingtangmancha ge 50 BPL nokdangrangonikode tangka paisarangkoba ra·jaha.
“Uni company-ni bidingo chinga kakketko ma·sina am·sandion, ua an·tangan Williamnagar-ona re·bae chingna uni lekkarangko mesokeaha indiba ua maming saloba ching baksa video call gitade agangrikjaha. Chingni kamo ra·ani jadokmang nangaha aro ia bilsini March 30 tariko chinga Williamnagar-ni office-rangko nokdonggaaniona ukoba okamataha,” ine DSEDO-ni membor saksa aganaha.
Kamrango manderangko ra·a matchotani ja·man, Williamnagar-o chalaienggipa Shiksha Barta-ko Zonal Education Media Office (NEMO) ine biming mingenba chalaina a·bachengaha indiba ua ZEMO-ko kulianioba an·tangni kamrangko pa·sike re·bana gita jechakataha ine DSEDO-ni membor parakataha.
ZEMO-ko chalaiani jagni batangna a·bachengahaon ia mandeni togiako ma·sina a·bachengtokaha maina jabrina kingkingba ua kam ka·giparangna dormaharangko on·atjaha aro una phone ka·atanirangkoba ua ra·chakjana gita a·bachengaha ine u·iataha.
Una changni chang phone ka·atani ja·manoba ua ra·chakjahani gimin July-ni 7 tariko Williamnagar police station-o FIR-ko ka·aha aro police-rang, iani bidingo sandirokna a·bachengataha.
Police-rangna FIR-o janapatani gitade, dos dakgipa Pradhan-na gimik gong 35,89,740 tangkarangko membership fee daka gamatahachim indiba kam ka·giparangna da·alonan uamangni dormaharangko on·jahachim.
Indake ong·engon, jagnina kate dongani ja·man dos dakgipa mandeko police-rang September-ni 8 tariko New Delhi-ni Amor Colony PS ning·o donggipa biap damsaoniko rim·na man·aha aro uko Williamnagar-ona rimbapilengaha ine East Garo Hills a·jani SP in-charge Shailendra Bamaniya parakataha.