U·IATTIMGIPAONI
SHILLONG: Meghalaya Legislative Assembly-ni Autumn Session-ko bakkandikate ong·ataniara a·doko manderangni nangchongmotgipa kamrangni gimin chanchirimaoni kate chakna jotton ka·aniko mesokanisa ong·enga ine Sukrobar salo, a·dokni gitcham Chief Minister aro Opposition Trinamool Congress (TMC) parliamentary party-ni dilgipa Mukul Sangma, NPP-chi dilenggipa MDA sorkariko matnangataha.
“Uamang an·tangtang joke katnasa ramako sandienga indiba sani namgnina uamang iako dakenga? An·chingni a·songo sorkarini skanggipa daitode manderangni nanganirangko chu·sokate on·anian ong·a aro Assembly-o an·ching chanchina nanganirang bang·en dongachim,” ine Sangma, Autumn Session-ko bakkandikate ong·atengani gimin sorkariko matnange aganaha.
Assembly-o Opposition dolrang, manderangni nangani krisa ku·rangko on·engon, ia nanganirangna sorkari maikai aganchakaniko on·a ua Assembly nigen ineba Sangma parakataha.
Assembly-o chanchirimna nangenggipa kamrang bang·en donga ine janapatengon, “Session-o opposition membor-rang aro treasury bench-oniba bang·en sing·anirang dongachim indiba somoirangkon bakkandikbeesa jakkalenga ong·ode badita ming sing·anirangna uamang aganchakaniko on·na man·gen,” ine TMC-ni dilgipa, suk ong·gijaniko parakataha.
HNLC bobil dol baksa agangrikani aro uandakgipa dingtang dingtang nangchongmotgipa kamrangni bidingo uamang sing·anirangko on·somanaha ine talataniko on·angengon, iandakgipa nangchongmotgipa sing·anirangkode sorkari, manderangni namgnina aganchakna aro talate on·na nangchongmota ine Sangma aganaha.
Opposition dolrangni gisepo nangrimani dongjaenga ine Deputy Chief Minister aro Parliamentary Affairs Minister Prestone Tynsong-ni agangipa kattarangni bidingo janapatskaengon, “Ua indakgipa kattarangko ra·baenga ong·ode Assembly-ko chalaiani, jera ra·grikani aro uandakgipa kamrangni bidingo sorkarini aganchakani gimin chinga uamangna sing·aniko ra·baskana nanggen,” ine Sangma parakataha.
Assembly-o skanggipa changna seoka man·gipa membor-rang bang·en donga ine janapatskaengon, “Assembly-o nirok sandiani dongna gita nanga aro iano dolgni name jera ra·grikna aro apsan chanchirimna gita cholrangko man·na nangchongmota,” ine TMC parliamentary party-ni dilgipa aganaha.