U·IATTIMGIPAONI
TURA: Re·anggipa Bristibar salo, Garo Hills Environmental Protection Society (GHEPS)-ni gita Environmental awareness program-ko North Garo Hills a·jani headquarter Resubelpara-o ong·atangaha aro ia awareness program-ko ong·atanio dingtang dingtang mondolini dilgiparang, politics-ni dilgiparang, songsalna kam ka·giparang, sorkari officer-rang, chatro chatrirang aro skigiparangba dongpae bak ra·angtokaha.
Ia environmental awareness program-ko ong·atanio jinmana agan-talate on·anggipa manderangara, GHADC-ni gitcham CEM PK Sangma, Garo Baptist Convention-ni gitcham president AG Momin, North Garo Hills a·jani ADC TR Marak, Resubelpara DIET-ni Associate Professor Dr Junebirth A Marak, North Garo Hills-ni DSP PM Sangma aro AB Krima No 17-ni Executive Secretary Rev Enbirth K Marak ong·a.
Ia program-ko ong·atanio dingtang dingtang dilgiparang aro officer-rang, jinmana aganprakangengon, samtangtango ong·telaigiparangko ripinge rakkina nangengani gimin aganangenba, Garo Hills-na Isolni ka·sae pattigimin buring bolgrimrangko, chiring chibisikrangko aro samtangtango pilak ong·telaigiparangko ripinge rakkichina gita jolo songdongenggipa manderangko didiangtokaha.
Bon·kamao, South Garo Hills a·jani gitcham Deputy Commissioner HB Marak, samtangtango ong·telaigiparangko ripinge rakkina gita jinmako ku·mikchetdilangaha.