Sombar salo NGEA tom·e chanchigen
U·IATTIMGIPAONI
TURA: Garo Hills Autonomous District Council (GHADC)-o kam ka·enggipa manderang, dormahatangtangko man·gija da·o ja 31 ong·pilengahani gimin da·al Sombar salni bako GHADC-ni Non-Gazetted Employees Association (NGEA), tom·e chanchirimangenba, kamrangko dontonge jingjengatna tik ka·angaha.
NGEA-ni president Brithen M Sangma-ni parakatani gitade, re·anggipa August-ni 29 tarikon uamang, GHADC-ni CEM aro gipin dilgiparangko grongenba, kam ka·giparangna ta·raken dormaharangko on·china mol·molahachim indiba da·alona kingkingan kam ka·giparangni dormaharangko on·ani bidingo GHADC-ni dilgiparang, maming ku·rachakanirangko on·kujaengani gimin da·al Sombar salni bako uamang tom·e chanchirimangtaienba, kamrangko dontonge jingjengatna tik ka·aha.
“GHADC-o kam ka·giparangni dormaharangko September 15 tarikni gisepon on·china chinga GHADC-ni Executive Committee-na somoiko on·ahachim indiba da·o 15 tarik batangpilona kingkingba dormaharangko on·ani bidingo maming ku·rachakanirangko on·a dongkujaenga. Uni gimin chinga Sombar salo, NGEA-ni gita chanchirimangtaienba, GHADC-ni kosako jingjengatani bidingo chanchianggen,” ine Sangma parakataha.
“Chinga an·tangtangni dormaharangko man·gija da·o ja 31 ong·pilengaha indide maikai chinga janggi tangna man·gen? Chingoba nokdang donga aro dedrangrang dongpaa, dedrangrangni skul fee-rangko chinga maikai gamna man·gen?” ine NGEA-ni dilgipa Brithen M Sangma sing·doataha.
Ia sal somoirango pilak bosturangni daman namen rakaha indiba GHADC-o kam ka·giparangde ja 31 ong·pile dormaharangko man·jaengani a·selan cha·a gri ringa gri ong·na nangtokengaha ineba ua parakataha.
“Indita jarangna dormaharangko man·jagenchimode sawa chingna tangka paisarangko sro-snamnaba on·kugen? Chingni dedrangrangni skul fee-rangkoba chinga indita jarangna gamchipna man·gija dongna nangenga indide chingni dedrangrangara maikai skulrango poraipana man·gen?” ineba Sangma sing·doataha.
Indake ong·engon, GHADC-o kam ka·giparangna ku·rachakgimin 5th pay commission-koba da·onan on·gija 4th pay commission-kon on·kuengani gimin NGEA suk ong·gijaniko parakataha.