U·IATTIMGIPAONI
SHILLONG: Meghalaya a·dokko man·ani ja·man a·doktangni Lyngdoh-rang, Sangma-rang, Marbaniang-rang aro Kharkongor-rangsa sason ka·gnok ine a·dokni manderang ka·dongsotokengachim indiba da·alonan a·dokko ‘Kumar’-rangsa sason ka·engkua ine Budbar salo, Voice of the People’s Party (VPP)-ni MLA Ardent Miller Basaiawmoit, Assembly-o an·tangni suk ong·gijaniko parakataha.
A Ali-ko MSCTE-ni secretary songani gimin Assembly-ni Autumn Session-o kan·dike chanchirimaniko dakdilangengon, British-rang India a·songni manderangko sason ka·engmiting somoio India a·songko drae bamataha ine manderang agantokenga indiba Meghalaya a·dokko man·ani ja·manoba a·dokni manderang, Lyngdoh-rang, Sangma-rang, Marbaniang-rang aro Basaiawmoit-rang sason ka·skagnok ine ka·dongsotokahaoba da·alonan gipin jatrangni ning·osa dongna nangkuenga ine VPP MLA parakataha.
A Ali-ko MSCTE-ni secretary songaniara niamni a·palo ong·aha ine janapatengon, A Ali-ko MSCTE-ni secretary songna Cabinet-ni ra·chakaniara Polytechnic-ni lecturer-rangna namen ra·chakna man·gijaniko ong·ataha ine Basaiawmoit parakataha.
Iako nipiltaichina gita a·dok sorkariko didiangskaengon, gipin biapni manderangkoba mande ra·nade nanga indiba a·doktangni manderangkon sorkari mande ra·chengna nanga ine Basaiawmoit aganaha.
VPP MLA-ni parakatani gitade, ia official an·tangni kamoni neng·takangani ja·man an·tangna kamko nakatatesa on·aha aro ian namen kragijani ong·ahachim.
Ia chanchirimanina a·dokni Education Minister Rakkam A Sangma, aganchakaniko on·angskaengon, A Ali-ko Meghalaya State Council of Technical Education (MSCTE)-ni secretary songaniara niamni a·palo ong·a ine matnanganiko jegalatskaaha.
A Ali-ko MSCTE-ni Secretary songanio uni kamrangko nichengesa sorkari kamo donataha ine talataniko on·angengon, a·dokni manderangna sorkari nambatgipa lekka poranikosa on·na nangnikengani gimin kamni gimin u·i-ma·sigipa mandekoba nichengna nangchongmota ine Education Minister parakataha.
2008 bilsini Office order-o pangchake, ia officer-ni kamoni neng·takangani ja·man August-ni 25 tariko Cabinet, A Ali-ko MSCTE-ni secretary songna ra·chakaha ineba Sangma parakataha.