U·IATTIMGIPAONI
TURA: South Garo Hills a·jani Chokpot jolo donggipa Badugre songo niam gri ro·ong bikotaniko dontongchina gita jolo songdongenggipa manderang aro dingtang dingtang dolrang, changni chang u·iatani ja·manoba ia biaponiko niam gri ro·ong bikotenggipa contractor, an·tangni tol·e tarigipa lekkarangon pangchake ro·ongrangko bikotengkua ine Bristibar salo, Chokpot jolni FKJGP, AHAM, GSMC aro AYWO dolrang parakatenba, ia songo niam gri ro·ong bikotaniko ta·raken dontongchina mikrakataniko on·ataha.
Iani bidingo ia dolbri NGO-rang, South Garo Hills a·jani Deputy Commissioner-naba badi ka·e sedoataha aro ia songo niam gri ro·ong bikotaniko ta·raken champengatchina didiataha.
“Chokpot Badugre songoniko niam gri ro·ong bikotenggipa contractor Alpha Marak, Chokpot joloniba ong·ja indiba ua Nokma lekka baksana dingtang dingtang nanga lekkarangko tol·e tarienba, ia songoniko niam gri ro·ong bikotenga,” ine SGH Deputy Commissioner-na sedoatgipa chittio, ia dolbri NGO-rang parakataha.
NGO-rangni parakatani gitade, ia 2023 bilsini March 14 tarikon, Chokpot jolo songdongenggipa manderang baksa tom·enba, ia songo niam gri ro·ong bikotaniko dontongchina u·iatahachim indiba ia contractor, an·tangni tol·e tarigipa lekkarango pangchake, niam gri ro·ongrangko bikotengkuachim.
“Uni gimin mikkangchiba ia songo niam gri ro·ong bikotaniko dontongjagenchimode chinga nanga gita dingtang ja·kurangko de·angskagen,” ine NGO-rang mikrakataniko on·ataha.