U·IATTIMGIPAONI
SHILLONG: Expenditure Head 104,Promotion & Publicity-ni ning·o manianirangna koros ka·angna chu·gimik tangka gong kror 27.5-ko a·dok sorkari chamaha aro ia budget-ni ning·on ong·nasienggipa festival-rangna organizing event-rang jekai Cherry Blossom baksa chamgipa tangka paisarango man·gopanggen ine Tourism-na in-charge ong·gipa Paul Lyngdoh Sukrobar salo rongtale agan-talatangaha.
Ia bilsio India aro Thailand-o October 1 tarikoni 30 tarikona Road-oni Cherry Blossom Festival aro November 17 tariko Cherry Blossom Mega Music Contest-ko ong·atna Tourism Department-na banoniko fund-rangko a·dok sorkari tariangenga ine North Shillong-oni VPP MLA Adelbert Nongrum-ni gita sing·anina Paul Lyngdoh aganchakangaha.
“Ia manianiko Meghalaya a·dokni gita dolsamangmang fund ka·a ong·ja indiba iarangna tangka paisarangko man·a bakrime ong·atenga aro ticket-rangko palanichi tangka paisarangko chimonganichi korosna ianonikon jakkalanggen,” ine Lyngdoh aganangaha.
Batanggimin bilsio festival-ko ong·atna skang ticket pale man·e tangka gong kror 1.25 man·anichi fund-ko man·aha aro bakrime ong·atanio tangka gong ror 1-ko man·soaha. “Ia bilsio, tangka gong kror 2-ona ticket-rangko pale man·anichi fund-rangko man·angna chinga ka·dongsoenga, aro ian perfrom ka·giparango pangchakgen jekon da·o bon·kame nianggen ine ua agandapangaha.
“Bang·bate ticket-rangko palangna aro gipin a·songni manderangna chugipa gadango gisiko nangatna dolgni a·songtang aro gipin a·songni gita organized ka·aniko bang·batatna miksongenga,” ine ua agandapangaha. Ia festival Meghalaya a·dokna jakkaltogipa bostu gita ong·e dangdike on·angenga, biap nina re·bagipa gipin a·songni manderangko rimchaksoanian a·dokni gadang tang·doako mesokangenga aro a·gilsak gimiko namgipa agananirangan jingjengangenga, Cherry Blossom Festival dingtangmanchagipa a·song aro gipin a·songrango namgipa bimingko man·angaha aro ian a·dokni mikkim rasong ong·enga ine Paul aganaha.
“Meghalaya a·doko ia festival-rangko ong·atgiparang dingtang dingtang namnamgipa kamrangko dangdike on·anga. Skanggipa, songtangni crestivity-ko tang·doatangna aro cultural exchange-ko dakna aro songtangni artist-rangna aro musican-rangna a·songni aro gipin a·songni artist-rang baksana uamang an·tangtangni changa sapaniko mesokangpana ia festival cholko on·a,” ine ua aganaha.
Ia event-rangko bilsiantian ong·atenga, ine ua aganaha. 2021 bilsio Cherry Blossom ong·anggipao komibeoba sak 45,000-ni gita manderang dongpaha jeon unoni 25%-ni gitade gipin a·songoni re·bagiparang ong·a, Salgittammangmango sak 10,000-na bate tourist manderang sokbaaha. Apsan dake batanggimin bilsio Me’Gong Festival-ko ong·atao lak 3.5 manderang sokbaaha, ine Paul aganaha.
Department-oni data-ko parakatani gitade, 2022 bilsio tourist-rangni gita ticket breanggiparang bang·bata.
“Festival ong·ani somoio dongchakani biap gimikan book ka·gimin ong·tokaha, a·doko dongchakchengani biaprangna revenue-ko tang·dodapate tariangaha, songtangni gita dokanrangko rikanganichi, cha·anirangko song·e palanichi, songre songgabatana gari para salanichi aro unagreba gipin dakgiparangko chol on·angchi tangka paisa man·dapana man·a,” ine ua agandapangaha.