U·IATTIMGIPAONI
New Delhi: Northeast ba salgro salaram jolni MP-rang Mr Vincent H Pala-ni dilanio ma·mongni Roads and Transport-ni Minister Mr. Nitin Gadkari-ko grongeaha. Indake National Highway 6 rama tarianiko nirokatchina aro Meghalaya, Assam, Mizoram aro Tripura unbaksana a·songni gipin bakrangni traffic-o nirokatchina mol·molaha.
MP-rang, Mr Gadkari-ko Parliament-o gronge, una joint letter-ni copy-ko on·aha. “Chinga ma·mongni Ministerna Meghalaya Shillong-ni NH 6 rama namgijani obostako u·iataha. Meghalaya-ni NH 6 rama, Silchar, Mizoram aro Tripura baksa nangdimatgipa ong·a” ine Pala, koborna u·iataha.
Ia mongsonggipa rama, jean adita border a·dokrangko nangdimatgipa ong·a, ua ramani obosta namjabeenga, jeni a·sel jolni manderang aro songregiparang neng·nikako man·tokenga aro chelchak-naljokanio namen kenbegnigipa ong·enga ine MP-rang aganaha. Uni gimin ua ramako man·a dipet ta·raken tarichina mol·molaha.
Iarangna agreba MP-rang, Highway-o traffic jam ong·a bilonganiko janape, NH 6 ramako a·palbatatna aganaha. Jedakode ramao re·ruragipa garirang maming neng·nika gri re·na man·gen. Ian Northeast ba salgro salaram a·jol gimiknin economic-ko namdapatgen.
MP-rang a·jolni dintang dingtang ramarangni obosta namgijagipani noksarangko ra·ange Minister-na mesoke on·aha.
Minggipin NHAI, rama namgijarangko tarija ong·ode, Sombar saloni antigimikna salo ramarangko champengatna Khasi Students Union, ka·mikkenataha. Mija jarango NH 6 rama mikka jime waanichi a·a rurongdapa a·sel rama champengatako man·aha.