U·IATTIMGIPAONI
Tura: Dadenggre jolni MLA Rupa Marak, uni constituency Jengjalo rikgipa oxygen plant-ko rikanio koros bon·ani gimin sing·on, nangnika gita aganchakaniko man·jani gimin suk ong·gijaniko parakaha.
“Mni Sukrobar salo matchotanggipa Assembly session-o anga Garo Hills a·jao rikgipa oxygen plant-ni korosni gimin sing·ahachim indiba anga kragipa aganchakaniko man·jaha, ian jajrengani ong·a ine Rupa aganaha.
Oxygen plant-rangko sorkari scheme-chi ba saniba koroso rikahama ine MLA Rupa sing·ahachim.
“Sorkari scheme-oni ong·gija saobasa an·tang tangkako jakkale rikaha ong·ode, ua mandko chinga mittelna kusi ong·gen. Indiba sorkari chingni scheme-ni gita rika ong·ode, kragipa aganchakaniko man·a nanga. Plant-ko rikanio chu·gimik u·iatanirangko chinga u·ina nanga, ine Dadenggre MLA aganaha.
Bilsi gittamni gisepon Garo Hills-ni dambonga district-rango chu·gimik ge 8 oxygen plant-rangko rikahachim, jeoni ge·sakoba a·bachengkuja. Rikgimin plant-rangko ab·achengata ong·ode Garo Hills-ni a·jolrango donggipa hospital-rangona nangnika gita oxygen-ko man·genchim, oxygen-na maming neng·nikan dongjawa. Covid sajinma sokani somoio ia oxygen plant-rangko rikahachim.
MLA Rupa-ni aganani gita, oxygen plant-ni bidingo minggni sing·anirangko donahachim, indiba uni sing·anina kragipa aganchakaniko man·jaha.
“Chinga gimikan oxygen plant-ko a·bachengkujani gimin u·ia, indiba maini gimin a·bachengna man·kuja? Iani bidingo jinma manderang u·ina nanga, ine MLA agankuaha.