U·IATTIMGIPAONI
WILLIAMNAGAR: PRIME Agriculture Response Vehicles (ARV) scheme-ni ning·o gari bolbongako Sombar salo, a·dokni PHE Minister aro Williamnagar-ni MLA Marcuise N Marak, dingtang dingtang dolrangna pakwate on·ataha.
Diltugipa songrango game ge·e cha·enggipa manderang, an·tangtangni game ge·e man·gipa bosturangko bazaar antirangona ra·bae palna man·na gita sorkari, ia PRIME Agriculture Response Vehicles scheme-ko a·bachengatahachim ine nikna man·a.
Ia garirangko, Sombar salo a·dokni PHE Minister, Bonegre FPO, Chikalgre FPO, Darugre Chikama FPO, Milawe Songma IVCS Limited aro Nengmandalgre Women’s Multipurpose Cooperative Society-na pakwate on·ataha.
Ia garirangko pakwate on·angani somoio a·dokni PHE Minister, jinmana aganprakangengon, ia garirangko an·tangtangni namgnina name jakkalchina gita didiangenba, gariko songni nokni namgnina jakkalchina gita Marak ku·pattiangaha. Ia tom·anio ua, a·dokni Skotong Minister Conrad Sangma-ni a·bachengatgipa CM Elevate Program-ni giminba jinmana talataniko on·angaha aro bading chiwalanio gisik nanggipa chadamberangna maikai sorkari dakchakna miksongengachim uarangni gimin talate on·angaha.