U·IATTIMGIPAONI
AMPATI: South West Garo Hills a·jao ra·gate ka·enggipa dingtang dingtang scheme-rangko nipilna gita Mongolbar salo, Tura-ni MP Agatha K Sangma, District Development Coordination & Monitoring Committee (DISHA)-ni tom·aniko Ampati-o donggipa DRDA Conference Hall-o ong·atangaha aro ia tom·anio Rangsakona-ni MLA Subir Marak, Mahendraganj-ni MLA Sanjay A Sangma, South West Garo Hills a·jani Deputy Commissioner RP Marak aro dingtang dingtang officer-rangba bak ra·angtokaha.
Ia tom·anio ge 15 department-ni officer-rang, an·tangtangni department-ni gita jako ra·e ka·enggipa scheme-rangni bidingo agan-talatanirangko on·angaha aro scheme-rangko chu·sokatanio mai dakgipa neng·nikanirangko chagrongna nangengachim, uarangni giminba Tura-ni MP-na talate on·angaha.
Ia tom·anio, Medical department-ni gita talatanirangko on·angengon, Ampati Civil Hospital-na child specialist-rangko aro anesthetist-rangko nangengani gimin, dingtang blood bank-ko aro blood storage unit-ni nangengani gimin Tura-ni MP u·iataha aro ua ia nanganirangko nangchakegipa ministry-rang baksa agangrike chu·sokatna gita ku·rachakaniko on·angskaaha.
Ia tom·anio Integrated Child Development Services (ICDS)-ni gita talataniko on·angskaengon, Anganwadi centre-rango bijolirang dongjaengani a·sel Early Childhood Development Program-rangna nangchakeaniko man·na nangenga ine Tura-ni MP-na talataniko on·angaha.
Ma·mong sorkarini ra·gatgipa dingtang dingtang scheme-rangko manderangona sokatna gita rakbee kamrangko ka·engani gimin South West Garo Hills a·jani officer-rangko Tura-ni MP Agatha Sangma mittelpilangskaengon, kamrangko nambate chu·sokatna gita department-rangni gisepo bakrime kamko ka·china ua dingtang dingtang department-ni officer-rangko didiangaha.
Ia tom·anio Rangsakona-ni MLA Subir Marak-ba officer-rangna aganprakengon, Rangsakona constituency-ni manderangna aro mongsongbate me·chik bi·sarangna namgipa lekka poraniko on·na man·na gita Damalgre-o Kasturba Gandhi Balika Vidyalaya (KGBV)-ko kulichina gita didiataha.
Ia tom·anio Mahendraganj-ni MLA Sanjay Sangma-ba jinmana aganprakengon, Mahendraganj constituency-ni ning·o dingtang dingtang project-rangko somoi gita matchotjaenganina an·tangni suk ong·gijaniko parakatenba, kamrangko nambate aro ta·rakbate ka·china officer-rangko didiangaha.