GUWAHATI: Re·anggipa bilsio Union home minister-ni dongao MoU soi ka·na man·aona chanchianirang chu·sokgipa a·dokni dam dok dingtang dingtang a·jolrangni sima-arirango pillar-rangko songna Assam aro Meghalaya a·dok damgnian chanchiaha aro indake golmal donggipa sima-arirangko matchotat-na bang·jaha.
“Namen ru·utbea sal somairangna chanchiani ja·mano Union home minister-ni mikkango sima-ariko mamlako namatna chinga MoU soi ka·aha indake da·ode chinga skanggipao ia dam dok dingtang dingtang a·jol-rangni sima-ari line-rang aro chongmotgipa krong ba post-rangko songe tik ka·aniko Assam aro Meghalaya-ni manderang-na u·iatna chinga kusi ong·beenga,” Meghalaya chief minister Conrad Sangma, mijal attamo inter-state sima-ari mamlarangni bidingo chief minister gadangni gita chanchi-grikani ja·mano kobor ra·timgiparangna aganaha.
Hahim, Gizang, Tarabari, Boklapara, Khanapara-Pillangkata aro Ratacherra-ko man·chape dam dok a·jolrangni gimin chanchia-nirang tik ong·manani ja·mano 2022 March 29-o New Delhi-o Union home minister Amit Shah-ni dongpao a·dok damgni MoU soi ka·aha.
“Assam aro Meghalaya sorkarini official-rang baksa Survey of India Hahim-ko survey ka·a aro uno sima-ari line tik ong·manaha uko da·alo chinga ra·chakaha aro maming neng·nikani dongjawa,” Sangma aganaha.“Bangki damgipin meligrikgijagipa dam bonga a·jolrango damgni a·dok sorkarirangni official-rang paltangtang gita Survey of India baksa chongmotgipa line aro bak dakani kamrang 2023 December 31-o matchotgen. A·dok ning·ni sima-ari mamlarangko namatna ian dal·begipa kam ong·a,” ua aganaha.
Chief-minister gadangni gita gnigipa bakko tik ka·na nanggipa Khanduli-Psiar, Block 1 aro Block 2, Borduar, Langpih, Desh-demoreah aro Nongwah-Mawtamur (Garbhanga) ia a·jolrangni giminba chanchigrikangaha.
“Mijal salni meetingo chinga damgipin meligrikgijagipa dam dok a·jolrangni gimin chanchi-grikaha. Dam gittam a·jolrangni mamlarangko tik ka·na chinga raken ja·ku de·enga. Man·adipet seng·gnange matchotatna a·jol damgnini committee-rang jotton ka·gen ine chinga chan-chiaha,” Sangma aganaha.
Block 1 Khanduli-Psiar a·jolo adita kajia-golmal ong·aha uko janape sorkaritangtangni police dolrang dal·en neng·nikani donggipa a·jolrangoni ong·katgnok aro darang-naba chakgijagipa jatchio dongaigipa CRPF dol uamangni sipairangko donatchina mol·molgen iako sorkari ge·gnian chanchiaha.
“Border outpost-rang donggipa a·jolrango a·dok damgnini manderang maming neng·nikaniko man·jawa uni gimin chinga CRPF (neutral force)-ko agangen…ua kenchakani donggipa a·jolrango a·dok ge·gnian police doltang-tangko ra·piltokgen. Iako manderangni gisepo ka·-donganiko dakna dakenga aro maming kajia-golmalko ra·bajachina namgipa kattarangko aganatenga. Aroba ua a·jolrangona re·angchina chinga a·gipi official-rangko aro a·jolni committee chairperson-rangko aganaha,” Meghalaya chief minister aganaha.
“Ia bilsini October jani brigipa antio chief minister sakgnian Khanduli-Psiar-ona re·anggen,’’ kragipa namatani cholrangko dakna jotton ka·enga,’’ ua agandapaha.