U·IATTIMGIPAONI
SHILLONG: Bharatiya Janata Party (BJP)-na kamko ka·anio kakket ong·anio pangchakesa BJP-ni state president-rangko seokronga ine Mongolbar salo, BJP-ni national vice president aro Meghalaya-ni in-charge Chuba Ao parakataha.
BJP Meghalaya-ni gitcham state president Ernest Mawrie-ko ra·gala ine matnanganirangna aganchakaniko on·angengon, gitcham state president-na dongimin term bon·ahani giminsa uni biapo gital president-ko songskaaha ine Ao parakataha.
An·tangni Nagaland a·doko BJP-ni president ong·aniko toe janapatengon, darang president-an gimikankode chu·ongnikatna gita man·jawa ine Ao aganaha.
Meghalaya a·dokni gital BJP president Rikman Momin-ni gimin sing·anina aganchakaniko on·angskaengon, “Angni BJP-o napchenga intalan anga uko ma·sia aro ua pangnan kamtangko jripjrip ka·e pangnan BJP-ni kamrangko chu·sokatgipa ong·a,” ine Meghalaya a·doko BJP-ni kamrangko nirokenggipa Ao aganaha.
“Sawa kakket ong·e kamko ka·enga ukosa BJP-de nia,” ine ua aganaha.
Indake ong·engon, Meghalaya a·doko BJP-ni gital office bearer-rangko bakan songgnok ineba Ao parakataha.