U·IATTIMGIPAONI
SHILLONG: Dingtang dingtang gadangrango nangrime kamko ka·anichi Meghalaya a·doko Bharatiya Janata Party (BJP)-ko mangrakbatatna man·gen ine Mongolbar salo, BJP-ni gital state president Rikman G Momin, kamtangko jako ra·eni ja·man kobor ra·timgiparangna parakataha.
Momin-ni aganani gitade, ua BJP-ko a·doko bilakbatatna an·tangko tariaha aro iako chu·sokgipa ong·atna gita ua BJP-ni gitcham state president Ernest Mawrie aro pilak dilgiparang baksa nangrime kamko ka·na miksongenga.
Gipinrangni bakrimani gride ua an·tang saksande a·doko BJP-ko mangrakbatatna gita man·jawa ineba Momin aganaha.
Re·baenggipa bilsio ong·atna sienggipa Lok Sabha election-ni gimin janapatengon, ma·mongo BJP-ko dilenggipa manderang u·iatahaon, uamang kamrangko ka·chichana a·bachenggnok ine BJP-ni state president parakataha.
Ma·mongo BJP-ko dilenggipa manderang ge·etaniko on·genchimode BJP, Shillong aro Tura Lok Sabha seat damgnion susaanggen ineba Momin parakataha.
Meghalaya a·doko BJP-ko ra·chakani gimin janapatskaengon, “A·songni Prime Minister Narendra Modi, kangal cholgrirangna bang·en kamrangko ka·engani gimin aro bang·bea scheme-rangko ra·gate on·engani gimin manderangni gisiko BJP-na ka·donganirang dongkuenga,” ine Momin aganaha.
Batanggimin changgni Meghalaya Assembly election-rango BJP chu·sokgipa ong·na man·jaha ine ku·chake aganangengon, Meghalaya a·doko uamang neng·nikanirangko chagrongna nangengoba da·o MLA sakgni dongaha aro jinmani bakrime kamko ka·anichi uamang nambata salrangko nikna ka·dongenga ine gital state president parakataha.
Meghalaya a·doko BJP-na pu·onanirang tang·doangaha aro da·o changgipinode uamang seat damgniko chedapna ka·dongenga ineba Momin aganaha.
Meghalaya sorkarini kamrango dakgualanirang aro tangka paisa jakkalsretanina matnanganirangko janapatskaengon, Meghalaya a·doko BJP-ba MDA sorkarini bakan ong·enga indiba banoba maiba dakgualanirang ba tangka paisa jakkalsretanirang donggenchimode uamang nangani kri ja·kurangko de·anggen ine BJP-ni state president parakataha.