U·IATTIMGIPAONI
SHILLONG: Israel aro Palestine-ni gisepo dakgrikanio Meghalaya-oni sak 27 Bethlehem, Jerusalem-ona re·anggiaprang, jachange dongtokenga.
Jerusalem-ona toromni gita songreanggiparang Meghalaya-oni sak 27 manderang, Israle aro Palestine-ni gisepo dakgrikani ong·engani a·sel Bethlehem-o jachange dongtokenga ine Chief Minister Conrad Sangma, koborna u·iataha.
“Bethlehem-o jachange donggiparangko simsak naljoke rimbapilna External Affairs Ministry baksa agangrikatenga ine Chief Minister, aganaha.
Sonibar salo Gaza-oni Hamas militant ba bobil dolni tanggitik chadrapao komibeoba sak 22 Isreal-ni manderang siaha. Indake Prime Minister Benjamin Netanyahu, ‘war’ ba dakgrikaniko parakataha. Christian-rang toromni gita Jerusalem-ona songreangronga, apsan dake Meghalaya-oniba pangna bilsian Jerusalem-ona songreangtoka.
Sonibar salo Hamas-o chadrapao sak 40 baten Israel-ni manderang siaha aro sak 700 baten jokkom ong·tokaha. Iarangna agreba sak 50 Israel-ni manderangko bobil dolni rim·gitangaha.
Bobil dol, Israel-ni sipairangko rim·gitange dongipa video-ko mesokataha.
Gaza-ni bobil dol, Sonibar pringo Israel-ni kosako chadrapaha.
Bobil dolni tanggitik chadrapanina warachakate Prime Minister Benjamin Netanyahu, ‘a·song dakgrikanio ong·enga’ ine parakataha.