SHILLONG: School -ni academic session, re·ba-enggipa jagnion matcho-tengjok indiba Shillong songjinmao traffic jam ong·ako nirokna gita a·bachenggipa STEMS bus project-o maming dake chu·sokaniko nikna man·-kujaenga.
STEMS project-ko ia bilsini Assembly election-na skangmangmangsa parakatahachim indiba ia bus services-ko jena mik-songe a·bachengataha-chim, ua kamna chu·soka-niko nikjaenga. School re·giparang an·tangtangni private garirangko jakkal-toka.
Adita sal somoirang skangsan a·dok sorkari, ‘songjinmani sak 70 student-rang ba poraigipa-rang, STEM service-ko jakkalenga ine Meghalaya High Court-na u·iataha. Indiba songjinmani sak 70 bi·sarangsan ia service-ko jakkala ong·ode, namen komia, school re·giparang-oni sak 50,000-de batna nanga ine court, janapaha.
Niatgenchimode STEMS-ni bang·a bus garirangkon ISBT Shillong-osa park ka·e dontoka, una agreba adita salrang skangsan ia bus gari traffic-o jachange dongako nikna man·aha.
Ia project-ko a·ba-chengani miksonganiara songjinmao traffic jam ong·ako komiatna ong·a-chim, maina bolsa bus garian bol 15 private car gita ong·ode ramao gari re·ruragiparang komigen ine ka·dongachim.
Ia bus gario CCTV camera, skia man·gipa staff-rang aro real time traking ba uandakgiparang donga.
Adita sarlang skangsan School Education and Literacy-ni Director Swapnil Tembe, ia bus gario song-reaha aro ia bus gariko office re·giparangnaba jakkal-na man·gen ine agan-ku·pattiaha.
Ia project-ni skanggipa phase ba bako bus service-ko Laitumkhrah aro Dhankheti-ni student-rangna jakkalna tik ka·ahachim, maina survey ka·on, bang·bate sak 27000 student-rang ia jolrango re·ruaa.
Bi·sarangni simsak-naljokaniko skanggipa done, STEMS, gital bol 30 GPS donggipa bus-ko ra·aha unbaksana skia -changgipa sapgipa driver, staff-rangko rakkiaha.
Beben STEMS authority, social media platform-ko jakkale bi·sarangni ma·a-paarangko ia gariko jakkalchina didina jotton ka·enga indiba ma·a-paarangko ia gariko jakkalatna gisik nangatna gita somoi nangkugen.
